L'anteriur president american Donald Trump è culpabel, uschia finescha il process pervi da pajaments per far taschair in'actura da porno. Per l'entira giuria da la dretgira a New York è Trump culpant e quai en mintga dals 34 puncts da l'accusaziun. Trump haja falsifitgà la bilantscha per zuppentar ils pajaments per far taschair.
In derschader vegn a decider sur il chasti per Trump ils 11 da fanadur. Che Trump stoppia ir en praschun, è tenor la correspundenta da SRF Viviane Manz betg probabel. E l'advocat da Trump ha gia annunzià da far recurs.
En la dretgira ha Trump ditg suenter udir la sentenzia che quella saja ina vargugna: In process manipulà saja vegnì manà d'in derschader corrupt. E la vaira sentenzia vegnia a dar ils 5 da november tras il pievel american. Lura ha lieu l'elecziun dal president american. Trump è l'emprim president american ch'è vegnì sentenzià pervi d'in delict.
