L'anteriur president dals Stadis Unids, Donald Trump, po tenor l'opiniun dal tribunal suprem dals Stadis Unids sa participar a las elecziuns preliminaras per il presidi da sia partida. Da stritgar ses num dal cedel electoral en il stadi federativ american Colorado na saja betg gist, ha il Supreme Court decidì.
La decisiun da la dretgira è in grond success per Trump – dentant nagina surpraisa. Tar in'audiziun l'entschatta favrer eri gia sa mussà ch'il nov derschaders decidian en ses senn. Per blers spezialists aveva la decisiun dal Supreme Court gia avant la sentenzia sco tala ina dimensiun istorica, perquai che la sentenzia ha in'influenza directa sin il decurs da l'elecziun dal president. La decisiun è crudada gist avant l'uschenumnà «Super Tuesday». Pia ha la dretgira procurà per clerezza avant il di d'elecziun impurtant. Mardi fan ils republicans ed ils democrats elecziuns preliminaras entaifer la partida en passa in tozzel stadis federativs, tranter quels er a Colorado.
Il tribunal surprem dal stadi federativ da Colorada aveva il december passà excludì Trump da las preelecziuns. Pervi da la rolla da Trump tar l'attatga da ses aderents, sin il capitol a Washington il schaner 2021 saja il topcandidat dals republicans exclus da la participaziun a las preelecziuns da l'onn proxim, hai gì num en l'argumentaziun da la dretgira. La squadra da Trump ha annunzià da far recurs al Tribunal suprem dals Stadis Unids. Lez ha ina maioritad conservativa da sis a trais, tranter quels trais commembers nominads da Trump.
