11 settember 1924: Tgi che taidla radio giu Turitg auda enturn las 20:30 in pled rumantsch dal fotograf ed inschegner Felix Huonder. In'ura pli tard prelegia el ina poesia da Giacun Hasper Muoth. Quai è stada l'emprima emissiun da radio per rumantsch. Bler è sa midà. Enstagl d'in pèr poesias datti oz dad udir novitads, emissiuns d'infurmaziun, divertiment e musica rumantscha sin las undas da Radio RTR. Per celebrar quest giubileum dat RTR in sguard enavos ed enavant.
In sguard enavos ed enavant
- Il svilup: In sguard sin l'istorgia dal radio e sia influenza. Nus avain tadlà en emissiuns dals davos 100 onns, discurrì davart il svilup tecnic dal radio. E nus avain tematisà l'influenza dal radio e co che quella è sa midada. Dal temp cura che betg mintgin aveva in radio fin ad oz, cura che mintgin ha televisiun, gasettas, radio e bler dapli en giaglioffa è capità bler.
- Introspectiva RTR: Tgi decida tge chanzuns che van sur l'emettur? Tge fa in redactur, ina producenta? Co vegnan «quels da las novitads» a savair tge che gira sin il mund? In sguard co che «radio modern» funcziuna.
- Il futur: Radio saja in medium che mora or, hai savens num. Ma constat quai? Tge èn ils trends dad audio, co scrivan intelligenzas artifizialas ina contribuziun e co vesa il radio dal futur ora.
- Di da la musica svizra: Ils 13 da settember, il di da la musica svizra, avain nus dà in sguard sin l'influenza dal radio sin la musica.
«Ils oldies» live sin Radio RTR
Pliras tschient persunas han lavurà per RTR ils davos onns. Ura e temp dad udir puspè in u l'auter moderatur u moderatura. Durant l'entira emna han anteriuras ed anteriurs puspè laschà reviver lur temp da radio. Las emissiuns as chattais sutvart:
L'entschatta ha fatg Agi Fetz. Suenter ch'ella è sa preschentada, ha ella tranter auter tradì l'istorgia davos il slogan «Tgi che sa rumantsch sa dapli». Ed ad ella han er dà en egl ils pleds englais che vegnan qua u là dovrads en las sesidas tar RTR – n'avessi betg dà pli baud.
Il segund di ha Christian Joos visità il studio. Da ses temp era el «La vusch da la Val Schons». En il discurs ha el tranter auter raquintà davart quai ch'el ha emprendì durant il temp sco moderatur. Plinavant ha el tradì ch'el haja anc oz mintgatant siemis nauschs dals studio.
Maria Cadruvi ha visità il terz di il studio da RTR. La dunna da 75 onns emprovia anc adina da restar alerta, sco durant ses temp tar il radio. Cumenzà aveva ella l'onn 1973 tar il radio, e quai sco secretaria. Suenter paucas emnas ha ella dentant fatg attent a ses schef, che quella lavur è memia pauc pretensiusa. Il rest è istorgia da radio.
Sco gia pli baud ha Martin Gabriel moderà la gievgia las gratulaziuns. Durant ses numerus onns tar RTR saja la moderaziun stada quai ch'el ha fatg il pli gugent. Spezialmain en memoria sajan restadas las bleras sentupadas cun la glieud e da vegnir ad enconuscher las regiuns e valladas.
Per finir l’emna da dals 100 onns Radio Rumantsch ha Men Steiner visità il studio per moderar in’ura. Spezial vi da quest’ura da radio è stada il livestream parallel en connex cun il Di da la musica svizra 2024. Il temp da moderar è gia passà 20 onns per Men Steiner, tuttina ha el er uss tar ses return dad in’ura gì plaschair da discurrer al microfon. Pli baud ha el cunzunt apprezià vi da sia lavur il contact cun la glieud, e da pudair far plaschairs als auditurs ed a las audituras.
-
audioIn'ura cun Agi Fetz al il microfon55:47 min, ord RTR Audio dals 09.09.2024. Maletg: RTRlaschar ir. Durada: 55 minutas 47 Secundas. -
audioIn'ura cun Christian Joos al microfon56:20 min, ord RTR Audio dals 10.09.2024. Maletg: RTRlaschar ir. Durada: 56 minutas 20 Secundas. -
audioIn'ura cun Maria Cadruvi al microfon56:06 min, ord RTR Audio dals 11.09.2024. Maletg: RTRlaschar ir. Durada: 56 minutas 6 Secundas. -
audioIn'ura cun Martin Gabriel al microfon55:13 min, ord Gratulaziuns dals 12.09.2024. Maletg: RTRlaschar ir. Durada: 55 minutas 13 Secundas. -
audioIn'ura cun Men Steiner al microfon55:35 min, ord RTR Audio dals 13.09.2024. Maletg: RTRlaschar ir. Durada: 55 minutas 35 Secundas.
