Igl è medemamain in di per scuvrir novas vuschs e talents da noss chantun. Dentant datti era d’udir gruppas che bleras rumantschas e blers rumantschs enconuschan anc da lur giuventetgna. Il di cumenza cun la preschentaziun dal 51avel Top Pop Rumantsch dal duo «ladunna».
In ulteriur highlight spetga en l’ura dals semperverds a las 16:00. «Ils Galiots» ed «El Mar Treis» – las gruppas actualas da pioniers dal rock rumantsch sco per exempel Flavio Huonder, Benedetto Vigne ed Elmar Deflorin emplainan in’ura cun nostalgia e rock vegl en in nov manti. Accumpagnads vegnan els da l’osp Men Steiner en il studio.
Il program dal di da la musica svizra
- 8:00 ladunna
- 9:00 Leander Albin
- 10:00 Dorotea Crameri
- 11:00 Angela Kilchör & Martina Linn
- 13:00 ANIKK & Nyna Dubois
- 16:00 Galiots & El Mar Treis
- 17:00 Petta Pagada & Marco Grischott
ladunna
Il duo cun Chiara Jacomet e Momo Kawazoe è naschì or da la Girlgroup «Chiara». Quest onn han ellas publitgà lur emprim album «Tgei ei masculin?». Dapi lura han ellas gia pudì sunar divers concerts. Tranter auter er a l’Open Air Lumnezia 2023 ubain quest onn en il vitg olimpic a Paris.
Leander Albin
La musica dal musicist ed artist da Tersnaus savess'ins descriver sco «Art Pop». Musica betg mainstream mabain artistica ed experimentala. Sper il far musica è Leander Albin organisatur dal festival Buatsch, fa teater ed ha quest onn retschet il premi da promoziun culturala dal Grischun.
Dorotea Crameri
In zic italianità e puschlavin datti cun la musicista e cumponista Dorotea Crameri. La giuvna artista è naschia e creschida si en la Val Puschlav. 2023 ha ella finì ses studi da bachelor en cumposiziun da film, teater e medias. Ella ha gia gudagnà differents premis da film ed è s’engaschada en differentas tgesas d’opera sco violinista.
Angela Kilchör
La chantadura da Wetzikon (chantun Turitg) ha gia dapi bun in decenni fatg musica avant ch’ella ha rescuvrì la lingua rumantscha. La fascinaziun per la lingua era gia naschida sco mattatscha durant las vacanzas a Laax. Suenter avair emprendì rumantsch scriva ella uss dapi insaquants onns atgnas chanzuns rumantschas.
Martina Linn
L’Engiadinaisa ha cumenzà sia carriera musicala cun musica populara e jodlar. Baud ha ella dentant fatg il pass en la musica da pop e folk ed è ida a Lucerna per studegiar musica. Sias emprimas chanzuns ha ella fatg per englais. Avant curt ha ella publitgà in cudeschet ed in disc cun classichers da la musica engiadinaisa.
ANIKK
L’onn 2024 è stà l’onn per la chantautura da Sagogn. Il 2023 ha ella publitgà il 50avel Top Pop Rumantsch «Tgi eis ti?» e silsuenter il 2024 l’emprima EP «Heart Breath». Durant l’entir onn ha ella lura pudì sa preschentar a differents festivals – tranter auter a l’Open Air Lumnezia ubain al Moon and Stars a Locarno.
Nyna Dubois
L’emprim ha Nyna Dubois accumpagnà artists sco Gimma, Duke ubain Sandee. 2004 ha ella gudagnà l’emissiun da casting «La vusch 04». Durant ils ultims 20 onns ha la chantadura da R&B, Soul e Pop gì success en diversas spartas. Tranter auter ha ella gudagnà 2020 in Swiss Music Award cun la gruppa Härz. Uss fa ella oravant tut musica solo.
Galiots
La gruppa da rock «Galiots» datti «be» dapi bun 20 onns. L’experientscha dals commembers da la gruppa tanscha dentant fin ils onns 80. Il chantadur Flavio Huonder era tranter auter part da «Caschiel, Carnpiertg e Remiedi». Lur musica fa anc adina endament ils onns 60 e 70 dentant in zic pli pauc punkig dentant cun la medema presa critica e cinica.
El Mar Treis
Ils pioniers dal rock rumantsch Elmar Deflorin, Benedetto Vigne e Thomas Gloor èn tuts gia pensiunads. Sco els din sezs sajan els dentant restads passiunads giuvens rockadurs che chantan e sunan mo pli per rumantsch e mo pli uschia co quai plascha ad els sezs. Quest onn han els era puspè publitgà musica nova.
Petta Pagada
La gruppa giuvna dal di sa cumpona da Laura Schmed, Julia Hansen, Dario Camenisch, Severin Bonolini e Mauro Arpagaus. Il 2024 han els sunà lur emprims festivals ed èn per il mument en il studio per registrar e producir lur album da debut. Cumenzà ha Petta Pagada gia il 2018 sco duo ed è uss sa sviluppà en ina gruppa da rock cumpletta.
Marco Grischott
Cun ses giuvens onns ha Marco Grischott tuttina gia ina gronda experientscha musicala. Dapi 2009 è el activ en la scena da musica. El ha fatg il bachelor da musica da jazz e ghitarra a la scol’auta d’art a Turitg. Ils 13 da settember – pia punctual per il di da la musica svizra – publitgescha el sia EP «Quens (pt. 2)».
La cumpart da la musica svizra
Schebain pop, rock, musica populara, jazz, opera, chant da chors ubain musica classica: Musica svizra da tuts geners vegna emessa sin ils emetturs da la SRG ed ha uschia ina gronda muntada. La cumpart da la musica svizra è tar tut ils emetturs gronda. Tar RTR munta quai sur l’entir onn bun 50%. Cun il di da la musica svizra vulan ils emetturs porscher ina tribuna a la musica varianta, da tuttas linguas e da tut ils geners, per uschia anc ina giada far attent sin noss prezius stgazi musical.
-
audio100 onns radio per rumantsch: Impurtanza per svilup da la musica15:49 min, ord Actualitad dals 13.09.2024. Maletg: RTRlaschar ir. Durada: 15 minutas 49 Secundas.
-
audioDi da la musica svizra: Tge as spetga?03:18 min, ord Actualitad dals 13.09.2024. Maletg: RTRlaschar ir. Durada: 3 minutas 18 Secundas.
