Las emprimas concessiuns da radio han survegnì urers il 1911 per pudair tschentar las uras tenor il signal da Paris, dentant èsi anc ì intgins onns fin ch'il radio è vegnì duvrà sco che nus enconuschain el oz - u almain in zichelin sco oz.
L'emprima staziun da radio en Svizra tudestga è stada la «Radiogenossenschaft Zürich». A partir dals 24 d'avust 1924 ha ella emess paucas uras per di musica, previsiuns da l'aura, novitads ed ils curs a la bursa.
Ils 11 da settember 1924 è lura stà il culp da partenza per il rumantsch sin las undas da radio. En quels 100 onns è bler sa midà:
Intgins highlights
1924
«La staziun de radio a Turitg dat oz ina sera taliana e romontscha» annunzia la Gasetta Romontscha dals 11 da settember 1924 – probablamain è quai stada l'emprima giada ch'ins ha udì la lingua rumantscha al radio.
En il Fögl d'Engiadina dal settember 1924 pudain nus leger: «Radio ais la parola del momaint. [...] Tuot la pressa svizzra discurrit da quaist enorm e grandius progress modern [...] chi po servir il pajais inter e chi pera già hoz dad esser il centro dad innumerabels apparats collios cun ella, da maniera ch'ella fuorma scu üna granda buocha chi clama tres l'intera Confederaziun.»
1954
La societad purtadra CRR (Cuminanza rumantscha radio e televisiun) vegn recepida en la SSR. En l'emprim rapport annual 1953/54 vegnan menziunadas las suandantas emissiuns: emissiuns da las nov, uras d'uffants, pregias e cronicas rumantschas en lingua tudestga.
1959
Sco prim tgirader da program en uffizi cumplain e cun domicil e plazza da lavur en il chantun Grischun vegn Tista Murk, da lezzas uras president da la CRR, engaschà. Ils 9 d'october datti l'emprima emissiun «Viagiond cul microfon» da Tista Murk, in'emissiun d'infurmaziun d'ina mes'ura l'emna.
1978 e 1984
Il program vegn schlargià e restructurà.
Il 1984 vegn introducida la quarta chadaina d'emetturs d'undas ultra curtas (UKW) en il Grischun per derasar las emissiuns rumantschas. Las emissiuns rumantschas vegnan schlargiadas da 40 minutas a 2 1/2 uras per di.
Quai n’è dentant betg stada la davosa giada.
2006
Dapi ils 15 da matg 2006 emettan Radio e Televisiun Rumantscha ord la nova chasa RTR a la Plazza dal teater a Cuira. En quest center da medias modern sa chattan era ils biros dals correspundents da la Televisiun svizra SF e da Radio DRS, da la Radiotelevisione svizzera di lingua italiana RTSI, ultra da quai era la filiala da l'Agentura svizra da novitads SDA ed il post central da l'Agentura da Novitads Rumantscha ANR.
La tecnologia dal radio
Transmetter emissiun sur undas è be pussaivel grazia a la tecnologia da radio. Insatgi ch'ha sviluppà la tecnica tar il Radio Rumantsch è Pius Paulin. El ha cumenzà il 1987 tar SR DRS, il 1993 è Paulin daventà responsabel tecnic tar la nova unitad da la SSR. Durant passa 30 onns ha el vis las midadas tecnicas dad analog sin digital e l'influenza che quai ha gì sin il far radio.
