Paulus ha scrit ch’i na duess betg dar ina differenza tranter umens e dunnas, tranter giuven e vegl e – sch’ins vul cumplettar quai – tranter persunas cun impediment e senza. Quai sent’ins en in servetsch divin inclusiv. Nus tutgain ensemen, di la plevonessa refurmada Astrid Weinert.
Teologicamain mussa quai, nus tutgain tuts ensemen.
La baselgia refurmada e la baselgia catolica envidan regularmain a servetschs divins per persunas cun handicap. Tenor Gisela Walser – ch’è spirituala catolica – èn quests servetschs divins inclusivs quai che fa ora els. Ma da vart catolica dessi resistenza, sche tuts servetschs divins vegnissan festivads uschia. La baselgia catolica saja fitg tradiziunala. Ma forsa fissi da far ponderaziuns perquai ch’ins ha da vart catolica baselgias mez vitas.
I fiss ideal, sche mintga servetsch divin fiss inclusiv.
Mintga persuna saja bainvegnida en mintga servetsch divin, di la plevonessa refurmada Astrid Weinert. Er sch'i po esser difficil per persunas cun in impediment spirtal da suandar in servetsch divin tradiziunal. Là datti parts pli lungas da pled, magari ina lingua cumplitgada e pretensiusa.
Tar la preparaziun da servetschs divins inclusivs guardan las duas spiritualas, ch’el saja ritualisà. I vegn adina cumenzà e finì tuttina. Astrid Weinert e Gisela Walser emprovan er da pledentar tut ils senns. Ellas dovran maletgs, fan magari gieus da rollas ed er la musica è impurtanta. Ed i ha adina ina part nua ch’ils participants e las participantas pon far insatge activ.
Las duas spiritualas concedan, che tals servetschs divins simplifitgads pudessan er pledentar uschiglio dapli persunas.
Quai dals smileys, quai è quai che resta, esser leghers e cuntents.
