Valposchiavo Turismo e Movimento – l’instituziun privata per persunas cun in impediment – han lantschà in project communabel: En la butia da l’ufficina amez il vitg vegn installà in fanestrigl d’infurmaziuns turisticas. Quel vegn lura gestiunà da las collavuraturas ed ils collavuraturs da Movimento.
Situaziun da win-win
Tenor ils responsabels dal project è questa situaziun ina situaziun da win-win. La destinaziun turistica survegn numnadamain in fanestrigl amez il vitg – pia bler pli central che quel ch'exista gia tar la staziun a Poschiavo – e las collavuraturas ed ils collavuraturs da Movimento survegnan tras la nova spierta er la pussaivladad da sa pudair furmar vinavant. Per pudair gestiunar il fanestrigl han els numnadamain absolvà differentas scolaziuns teoreticas. Er guidas tras la vischnanca han els fatg per scuvrir ils stgazis da Poschiavo e lura pudair cussegliar ils giasts.
