Lucas Quinter suna gugent, insumma ha el fitg gugent la musica. Quai saveva er Olinda Hosang ch'enconuscha Lucas Quinter e sia famiglia gia dapi onns en ed onns ora. Uschia haja ella fatg ina giada la proposta als geniturs da vegnir cun Lucas ad ina prova. «Quella emprima prova n'è betg gartegiada uschè bain. Nus avain dentant simplamain observà lezza saira ed essan lura puspè turnads in temp pli tard ad ina ulteriura prova», raquinta il bab Alfons Quinter. Uschia ha tut cumenzà. Quai è stà avant passa sis onns.
Nus avain buns gidanters ch'han mess sin via tut e fan quai bain. Quai fa bain al cor e constat uschia.
A l'entschatta hajan tuts gì da s'endisar ina vi da l'auter. I saja stà in process per l'entira musica, di Olinda Hosang, ch'è stada avant la pensiun pedagoga curativa. Lucas sa fidia cumplainamain dal tact ch'ella dettia avant ed uschia possian els far tut la musica ensemen. In «dream team» dapi onns. «Senza il sustegn d'Olinda Hosang na fiss quai betg pussaivel», di Renaldo Lutz, in dals bassists.
El sa fida da mai, jau dun il tact ed el è disà cun mai. Nus faschain quai schon blers onns ensemen. Quai funcziuna. Lucas enritgescha nossa musica.
Oz è tut daventà ina normalitad. Quai era grazia a l'avertadad e buna luna da Lucas. Lucas fa part da la Societad da musica Mustér sco tut las autras ed ils auters commembers er – quai durant provas, producziuns ed natiralmain era durant star da cumpagnia.
