Menduri Kasper (47) è actualmain il chau dal Maraton da skis engiadinais. Dapi prest nov onns lavura Menduri Kasper sco CEO da questa cursa populara da passlung che carmala onn per onn passa 14’000 curridras e curriders en l’Engiadin’Ota. Avant ha el lavurà sco responsabel da turissem a Silvaplauna, quai suenter avair frequentà la scola spezialisada superiura per turissem e management a l’Academia Engiadina a Samedan.
Jau hai adina gì in contact stretg cun il Maraton da skis engiadinais, ma jau mez n'hai anc mai fatg la cursa da Malögia a S-chanf.
A Menduri Kasper è il sport da passlung quasi vegnì mess en tgina. Il bab Curdin è numnadamain stà ils onns 80 trenader naziunal dals passlunghists svizzers. Oz maina el ina scola da passlung a Schlarigna. Era Menduri ha pli baud fatg cursas da passlung, quai fin ch’el ha gì 16 onns. La sora giuvna, Vanessa Kasper, è però sa decidida per il ski alpin e fa dapi intgins onns part a la cuppa mundiala da skis.
Profils «sportivs»
La chatscha na dastga betg mancar
Il temp liber deditgescha Menduri Kasper cunzunt a la famiglia. Ina giada l’onn stoppia el ir en vacanzas sper la mar, en il chaud. Blera energia dettia era la natira ad el e durant il temp da stad las turas cun il bike.
Jau hai bler pli gugent il chaud ch’il fraid, uschia sun jau atgnamain en il fallì lieu da chasa.
Lunsch davent dal Maraton da skis engiadinais è Menduri Kasper durant il mais da settember. Quest temp saja reservà per la chatscha – ina da sias grondas passiuns. Malgrà che nagin da la famiglia va a chatscha è Menduri Kasper sa decidì gia cun 20 onns da far la patenta.