Pir dapi paucs mais datti uffizialmain il duo «Happy, for real». Ils dus musicists han dentant gia avant collavurà ed èn perquai er sa decidids da fundar in duo.
Olivia Virgolin han ins gia pudì tadlar en differentas furmaziuns sco per exempel «Anatina» ubain «Modest Wealth». Cun il num «Biba» è ella er stada solo sin via. Solo sco musicist e producent enconuschan ins Marcus Petendi cun il num «Calandaboi». Pli enconuschenta era sia gruppa da indie pop «Polyphone» che ha publitgà pliras singles dapi l'onn 2012.
Lur experientschas ed influenzas musicalas maschaidan els uss en il duo «Happy, for real». Las emprimas singles èn gia d’udir sin diversas plattafurmas, radios ed era gia live durant l’Arcas Rock 2022. Durant l’october è lur nova single «Closer» d’udir en ils radios da SRF 3, Couleur 3, Rete Tre ed RTR.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
