Il musicist da Friburg è plain ideas. Quellas metta el enturn en divers projects musicals. Tranter auter era cun la band «Le Roi Angus» ch'ha gì success oravant tut en la Svizra franzosa. Cun ses project da solo cul num «Shuttle» fa el dapi plirs onns musica ed ha era gia gì ina chanzun da l’emna tar SRF Virus.
En sia musica electronica cun blers synthies – el numna ses stil «Hypersonic Pop» – integrescha el gugent era tuns da ses conturn. Uschia datti per exempel a l’entschatta da «Your Shoe Is Tied To The Other» era d’udir utschels ch'han forsa chantà durant ina spassegiada tras Friburg. Durant il settember è sia nova single d’udir en ils radios da SRF 3, Couleur 3, Rete Tre ed RTR.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
