Ils ultims set onns ha Mattiu Defuns cumenzà cun ina carriera exemplarica ch’è fin uss pli u main be ida ensi. Cun sia nova EP «Sur la Selva» in album pitschen cun sis chanzuns va el musicalmain in pau autras vias. Pli experimental cun tuns sferics e tut per rumantsch. Quai saia sia lingua materna e la lingua en la quala el sappia s’exprimer il meglier. Ina da quellas chanzuns novas è «Va lunsch» ch’è uss vegnida selecziunada per l’acziun Mx3 – tuts per in dal fanadur. En quella chanzun raquinta el dal desideri da partir, in tschert mal dal lontan dentant er dal plaschair da la patria e da sia passiun per la musica.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch .
