A l’entschatta na steva betg l’idea per ina chanzun, ubain ina jamsession communabla. Na, il culp da partenza era ina discussiun tranter Federico Sicila e Simone Romeo – musicists e producents. En in discurs è in concept ed il num per la band naschì. E pir or da quai è il giavisch creschì d’esser creativs ensemen e da far musica. Quai è stà ils 19 da schaner 2023. Uss datti l’emprima single da la gruppa: «Blu tramonto». Ensemen cun Alice Petronici e Rachel Dauchy han els mess ensemen ina chanzun sco resultat da lur exploraziun da la musica dals ultims decennis dal 20avel tschientaner.
Uschia sco la band saja construida èsi nunpussaivel da dir schi vegn a insacura in album u betg – quai di la band sezza. Segir è dentant ch’i vegn a dar suenter “Blu tramonto” anc insaquantas singles il 2025. E per l’entir mais è la chanzun uss d’udir en ils radios da RTR, SRF3, Couleur 3 e Rete Tre.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch .
