«ladunna»
Feminin, giuven e tuttina gia in pau experientscha en il satgados. Uschè descriva il duo «ladunna» sasez. Chiara Jacomet – la vusch profunda davos las chanzuns rumantschas che s’occupan cuntinuant cun dumondas criticas vers nossa societad. Sper ella, ina dunna plain schlantsch e curaschi che procura per tun, puls e ritem – la battarista ed arranschadra Momo Kawazoe. La cumbinaziun da quest duo procura per ina fusiun musicala unica e speziala.
Da la chanzun
Dar in caracter agen a lur chanzun – quai steva da bell’entschatta a cor a las duas dunnas. Inspiradas da «Dua Lipa», «Stromae» u «Chic» è lura naschì insatge fitg ritmic ed original che suttastritga la tematica da la chanzun.
Jau hai glimà ditg, fin ch'jau hai chattà noss 'sound'.
«Con bia valeta schai sin la pareta?» – quai è la dumonda centrala da la chanzun che pledescha da restar tar sasez e da betg sa laschar influenzar da tut las normas da nossa societad. «ladunna» tira anc vinavant questa dumonda: Tge ma plascha propi? Tge èn mes agens interess, e tge da quai è be influenzà da la societad, da normas e stereotips? Tut questas dumondas restan avertas. La chanzun animescha da far atgnas ponderaziuns. Tut quest cuntegn pacheteschan las giuvnas cun bler anim en lur mantè musical electronic.
Mx3 – tuts per in
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
Curt suenter avair preschentà il 51avel Top Pop Rumantsch èn las giuvnas Chiara Jacomet e Momo Kawazoe vegnidas elegidas per l’acziun «Mx3 – tuts per in» per l’october. Ussa pon ellas parter lur chanzuns cun ils radios da l’entira Svizra.
