ANIKK
ANIKK, ses num da batten Anik Casutt, era fin avant curt anc sin viadi senza il segund «K». Durant las registraziuns per ses emprim album è ella sa decidida da midar il num per uschia cuntanscher dapli attenziun tranter tuttas Anik's ch'i dat uschiglio. Per sia singularitad na stuess ella però betg far pensiers. Cun ses posiziunament en il stil da «Sad Girl Pop» ha la giuvna Sursilvana gia francà ina plazza en il cor da la scena da musica da la Svizra orientala.
La chanzun
Cun ses Top Pop Rumantsch «Tgi eis ti?» fa ANIKK in ulteriur pass sin territori frestg. Tgi che spetga ina ballada miaivla pudess esser trumpà. Gia suenter intgins tacts carmala la chanzun directamain sin il palc da saut. Malgrà text e chant melanconic sa tractia d'in titel da Techno che na crudass definitivamain betg si a la Streetparade.
Expertisa
La producziun plain energia, cun bler side-chain compression sin la 4/4 kickdrum accelerescha gia suenter intgins accords sferics sin il clavazin. Er sche la chanzun è plitost curta ha ella aifer curt temp in drive ch'ins enconuscha uschiglio plitost dal Vocal-Trance. La vusch d'ANIKK scutina la lingia principala entant ch'ils bass galoppan suten. La dumonda «Tgi eis ti?» na vegn betg respundida en il text, tut resta misterius sco quai ch'i tutga sin il palc da sautar. Ina chanzun gartegiada, ch'ins n'avess betg spetgà.
Producziun
Per la seria da Top Pop Rumantsch metta RTR ensemen artists giuvens rumantschs ed artistas giuvnas rumantschas cun producents da musica professiunals. Responsabel per la chanzun da giubileum «Tgi eis ti» è Sandro Dietrich. Il producent davos ils hits sco «Adios» da Loco Escrito e dirigent dal chor d'uffants «Singvögel» va adina pli savens e pli profund en il mund da la musica electronica. Gia d'udir è quai en las novas chanzuns dal rappunz «Giganto». Cun ANIKK va Dietrich anc in pass pli lunsch, cun ina producziun electronica puray, piz a cup sper Industrial.
Facit
Sut questas ensainas hai dà cun «Tgi eis ti?» ina chanzun da saut tschiffanta che munta tant per l'artista sco er per il producent terren nov. Ch'ins na senta mai quai è in indizi per la qualitad dals protagonists.
Playlist dals Top Pop Rumantsch
Tut ils titels da la seria Top Pop Rumantsch èn da chattar en trais collecziuns qua:
