Da tschella vart da la val – nua che l'Openair Lumnezia carmala natiers millis visitadras e visitaders – datti in pitschen festival sut tschiel avert, quai en il conturn d'in bain puril en il vitg da Tersnaus.
Leander Albin è president da l'uniun Lidimèr ch'organisescha il festival. Dapi sias entschattas saja il festival daventà pli professiunals, di Leander Albin. Ins haja reorganisà l'organisaziun en plirs ressorts. Il festival saja creschì sin var 400 visitadras e visitadras.
Il Buatsch festival porscha d'ina vart concerts sco ins enconuscha quai d'auters festivals, ma da tschella vart dettia er occurrenzas sco ina staffetta da far saiv sco gieu divertent. Per Leander Albin è il teater da Paula König in dals puncts culminants dal festival, quai sper las differentas bands. Plinavant dettia products agriculs producids sez.
Nus n'essan betg mo in open air da musica, nus avain era teater, prelecziuns ed exposiziuns d'art. La saira datti bands e musica da sautar enfin la damaun.
Planisà èsi da far en dus onns la proxim'ediziun dal pitschen festival. Co che quel duai alura vesair ora, na po Leander Albin anc betg dir.
