A la concurrenza da la EBU «Let the Peoples Sing» han quatter chors da giuvenils e quatter chors da creschids cumbattì per il titel «Silver Rose Bowl». Radiotelevisiun Svizra Rumantscha RTR ha emess directamain il final dals chors da giuvenils. Sper l'ensemble vocal incantanti dal Grischun han er ils BNR Children's Choir da la Bulgaria, il Copenhagen Girls Choir dal Danemarc ed il Chorus Iucundus da la Finlanda pudì chantar en il final.
incantanti gudogna il Youth Jury Prize
Il premi principal n'han incantanti betg gudagnà. Ma il chor è vegnì undrà cun il «Youth Jury Prize». Quest premi è vegnì surdà l'emprima giada dal «European Choral Association Youth Committee». Quai è ina gruppa da set giuvenils e giuvenilas da tut l'Europa ed in represchentant dal festival «Europa Cantat». Ad els ha incantanti plaschì il meglier.
Concert a Surrein
Audituras ed auditurs han pudì esser preschent a Surrein en la baselgia sogn Placi e radund 150 persunas han tadlà «Radio» en la baselgia. L'ensemble vocal incantanti cun ses dirigent Christian Klucker ha mussà ina prestaziun da vaglia ed incantà.
Enramà la concurrenza ha er il Chor mischedau da Surrein cun sia dirigenta Andrea Schmed Camathias. Ils dus chors han dà in pitschen concert per il public en baselgia e serrà giu la saira cun intginas chanzuns communablas.
Titel va en il Danemarc
Cun ovras da Matti Borg, Maurice Duruflé e Karin Rehnqvist ha il chor da mattas gudagnà il premi en la categoria «uffants e giuvenils». En la categoria «creschids» ha Hägersten A Cappella (Svezia) gudagnà cun ovras da Frank Martin, Sven-David Sandström e Libby Larsen. La giuria ha lura gì da decider tgenin da quests dus chors che gudogna la pli auta distincziun da la concurrenza «Let the Peoples Sing»: il «Silver Rose Bowl». Ed ella è sa decidida per il Copenhagen Girls Choir.
«Let the Peoples Sing» tar «Noss chors»
«Noss chors» va en Bulgaria, Danemarc e Finlanda e preschenta ils trais concurrents da l'ensemble vocal incantanti:
