Per Christian Klucker va cun quest project in grond siemi en vigur. El haja gia da ditg vulì far in project cun ils Incantanti cun chanzuns dals cumponists da la Val Schons. Per el saja quest project da chor er ina chaussa dal cor. Surtut las chanzuns e la musica da Tumasch Dolf sajan per el la musica da la tgina, ch'el dastgia uss cun passa 80 persunas lavurar vida quellas chanzuns saja in grond regal. La retscha da concerts dals Incantanti sa numna «rischs». Christian Klucker ha sias ragischs ad Andeer.
Per mai èsi sco vegnir a chasa.
L'idea per il project communabel cun ils Incantanti ed in chor da project cun indigens saja naschida en il discurs cun il president da la cuminanza culturala Val Schons.
Il project cun in chor da project demussa l'intenziun da la cuminanza culturala Val Schons; organisar occurrenzas per e cun la populaziun da la Val Schons e promover il rumantsch Sutsilvan.
Da las bleras annunzias èn Andrea Cantienie ed er Christian Klucker surstads ed han grond plaschair. Las chantaduras ed ils chantadurs engaschads vegnan da la Val Schons, la Tumleastga, la Mantogna, la Valragn ed ina chantadura fa schizunt il viadi da Basilea ad Andeer per las emprovas.
