Questa dumengia è il final da la concurrenza da chors europeica «Let the Peoples Sing», ina concurrenza da la EBU ch'ins er pudess titular l'ESC dals chors. Ensemen cun trais ulterius chors ord l'Europa cumbatta l'ensemble vocal incantani cun ses dirigent Christian Klucker per il premi «Silver Rose Bowl». Mintga chor chanta ses program en ses agen pajais e la EBU colligia ils lieus via las lingas da radio.
L'emissiun Noss chors ha preschentà ils ulteriurs trais chors che chantan en il final.
Dumengia saira, davent las 18:30 uras pudais vus tadlar la concurrenza en il radio. RTR emetta las producziuns da concurrenza directamain ord la baselgia s. Placi a Surrein.
L'ensemble vocal incantanti è sa preparà minuziusamain per il final. Tranter auter han els registrà il settember differentas chanzuns per in nov disc che duai cumparair anc quest onn. Cun il dirigent Christian Klucker avain pudì discurrer davart la preparaziun, las registraziuns per il disc, il final sco er davart concurrenzas da chant.
Duas concurrenzas aifer 10 dis
Sper la concurrenza «Let the peoples sing» sa participescha incantanti dals 10. – 14. d'october er al tschintgavel festival da chant internaziunal a Kalamata en Grezia. A questa concurrenza cumbatta l'ensemble vocal en trais categorias (chant sacral a cappella, chors da giuvenils e folclora) uschia ch'els pon be per part chantar las medemas chanzuns sco a Surrein.
Nov disc cumpact
Il settember ha l'ensemble vocal incantanti fatg registraziuns per in nov disc cumpact. Quel cuntegn cumposiziuns dals cumponists da la Sutselva, Tumasch e Benedetg Dolf, Curò Mani ed er Christoph Cajöri. Vitiers vegni a dar sin il nov portatun er chanzuns da las duas concurrenzas.
Il november stat lura sin l'urari dad incantanti anc trais preschentaziuns da «Die Schülerrepublik» en il chastè da Rehanau, in concert cun chant, teater e tschaina per il publicum.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
