Olivia Virgolin e Marcus Petendi èn gia s’inscuntrads avant plirs onns. Marcus n’ha da quai temp betg lavurà vid in auter project musical ed ha perquai pensà ch’i fiss interessant da lavurar ensemen ina giada cun insatgi nov. Uschia han els registrà pli tard communablamain la chanzun «Home» – da lezzas uras anc cun lur pseudonims Calandaboi e Biba. Quai haja funcziunà uschè bain ch’els èn gist sa decidids da fundar in duo e far musica da pop – quai ha Marcus detg durant in’intervista.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch .
Omadus èn plitost ruassaivels ed han fatg musica en differents projects, en gruppas sco era solo. El discurra rumantsch, ella tudestg svizzer, el ha las ragischs en il rock e punk ed ella ha fin uss fatg blera musica ruassaivla per siemiar. Ensemen saja quai ina fitg buna cumbinaziun han els tradì. In sa vegnir cun ideas in pau «stranas» e l’autra sa far vegnir surengiu qua e là. Uschia sa cumpletteschan quels dus musicists viceversa e creeschan il sound caracteristic da «Happy For Real» che vul aposta ir in zic cunter la moda dal mument (musica en il stil ni influenzada dals onns 90). Els èn inspirads da quests acts, cun ils quals els èn creschids si – per exempel Paramore, Phoenix ubain Bloc Party.
Il mars publitgeschan els lur emprima EP «Desperate Art» nua ch’ins chatta tranter auter la single «News». Ina chanzun che vul animar dad era ina giada tschentar giu e laschar davent conscientamain tschertas chaussas. Quai messadi pon els uss era derasar en l’entira Svizra durant il favrer en ils radios da RTR, SRF3, Couleur 3 e Rete Tre.
