Las relaziuns tranter la Germania e l'islam èn caracterisadas da cumplexitad e midaments, declera l’expert tudestg Eren Güvercin. Eveniments actuals e debattas politicas mettian sin maisa dumondas impurtantas che pertutgan tant la cuminanza muslima sco era la societad tudestga.
En Germania datti bleras discussiuns davart l’islam e l’immigraziun – spezialmain uss en vista a las elecziuns. Intgins eveniments che vegnan mess en connex cun l’islam, han fatg che las discussiuns èn daventadas pli intensivas. Eren Güvercin – in expert ch'enconuscha bain l’islam en Germania – declera che l’immigraziun saja savens il tema principal en las debattas politicas. Dapi las attatgas en ils Stadis Unids l'onn 2001 – l’uschènumnà «nine-eleven» a New York – vegn discutà bler davart l’islam, la radicalisaziun e la segirezza.
Güvercin di, che muslims giuvens en Germania sajan frustrads, perquai che las medias e la politica discuteschan savens mo chaussas negativas davart l’islam. I dat era critica che las cuminanzas muslimas na prendian betg adina posiziuns cleras, per exempel encunter violenza.
Per l’avegnir giavischass Güvercin ina nova politica che renconuscha la diversitad da la cuminanza muslima e che na sa concentrescha betg mo sin las grondas associaziuns. El spera ch'ina nova regenza en Germania prendia decisiuns pli cleras, spezialmain en dumondas religiusas. Quai pudess manar ad ina meglra collavuraziun e discussiun.
Migraziun e debattas politicas
Per la discussiun politica curt avant las elecziuns en la Germania èn ellas stadas sco ieli en il fieu: las attatgas a Magdeburg, Aschaffenburg e Minca. Ellas stattan en l’ina u l’autra maniera en connex cun l’islam. Quai haja procurà che la migraziun saja uss en il focus dal cumbat electoral actual, di il publicist Eren Güvercin.
...è dapi onns activ en la debatta davart l’islam en Germania. El n’observa betg be la discussiun en la politica tudestga, ma è er enconuschider profund dals svilups en las cuminanzas muslimas. El è commember da la Deutsche Islamkonferenz, fundatur da la Alhambra-Gesellschaft e confundatur dal PEN Berlin. Ses pli nov cudesch «Ditib und der ferngesteuerte Islam in Deutschland. Warum wir eine religionspolitische Zeitenwende brauchen.» (Beck) è cumparì la fin da schaner.
La migraziun haja stgatschà temas sco inflaziun e plazzas da lavur dal center da las discussiuns politicas, raquinta Güvercin. Era sche la migraziun na saja betg directamain colliada cun l’islam, influenzeschia ella la percepziun e las debattas davart las muslimas ed ils muslims en il pajais.
Dapi «nine-eleven» – las attatgas sin il World Trade center a New York l’onn 2001 – dettia constantamain debattas davart l’islam e muslims, radicalisaziun e segirezza. Dapi la gronda fugia da la Siria il 2025 sajan quellas debattas anc s'accentuadas.
E lura capitan da questas attatgas sco gist uss, che han in background islamistic, che fan che nus sco societad en Germania n’arrivain betg da discutar quests temas differents era vairamain moderà ed en tutta clerezza.
Frustraziun tranter muslims e muslimas giuvnas
Questas difficultads da discussiun – tant en la politica sco er en la societad tudestga – mainan puspè a consequenzas negativas per la convivenza, declera il publicist Eren Güvercin.
Jau ves ina gronda frustraziun ed er malcuntentientscha envers la politica tar la generaziun giuvna da muslims. Els han avunda da quai ch’i vegn mo discutà en las medias e la politica da l’islam e muslims, cura ch’i va per violenza, problems e conflicts.
A medem temp na contribueschian las associaziuns muslimas betg constructivamain ad in discurs pli raschunaivel. Ellas na sajan betg s'exprimidas cleramain, cura ch’i gieva per prender posiziun encunter la Hamas e sias attatgas terroristicas dals set d’october cunter l’Israel.
Necessitad d'ina nova politica
En l'avegnir è Eren Güvercin persvadì, ch’i dovria urgentamain ina politica religiusa differenziada che renconuscha la diversitad da la cuminanza muslima e che na sa concentrescha betg mo sin las associaziuns grondas sco DITIB, che dependan dal stadi tirc. El saja «precautamain sceptic» quai che pertutga la voluntad d'ina nova regenza tudestga da far exact quai.
Ma da l’autra vart hai jau ina tscherta aspectativa ed era speranza, ch’ina regenza manada da la CDU vegn ad avair – silmain quai che pertutga questas dumondas da politica religiusa – ina lingia pli clera, che l’anteriura coaliziun da l’ampla.
En pli dettia il privel che partidas da la dretga sco l'AfD pudessan attrar electurs conservativs d'origin tirc. Da quai stoppian era las partidas etablidas esser pli conscientas ch'enfin uss e persvader cun cuntegns, enstagl da sa basar mo sin ina politica simbolica.
Mo ina tala politica pudess manar ad ina meglra integraziun ed in discurs pli constructiv.
