Inscunters a Lörrach
Tge fatschenta las Tudestgas ed ils Tudestgs e tge pensan ellas da las elecziuns? Per eruir quai ha noss correspondent Adrian Camartin visità la citad da Lörrach, gist sper Basilea. Dus temas fatschentan il pli fitg. La situaziun da l’economia tudestga e la migraziun.
Entant ch’ils ins spetgan da la nova regenza a Berlin ch’ella dettia puspe schlantsch a l’economia e migliereschia la situaziun finanziala da la populaziun che lavura fan ils auters quitads per la democrazia. Quai pervia da la partida ‘Alternative für Deutschland’. L’AfD polarisescha, provochescha resistenza e demonstraziun ed il medem mument paran lur propostas da tutgar in gnerv tar ina part da la populaziun.
Economia en la crisa
Dapi dus onns è la Germania en ina recessiun. Las interpresas e la populaziun na san betg propi co ch'i duai ir vinavant. Tenor l’economa Geraldine Dany-Knedlik da l’institut DIW a Berlin patescha l’economia tudestg pervia da duas raschuns: La conjunctura flaivla ed ils problems structurals sco la demografia e la situaziun per part miserabla da l’infrastructura.
Per Dany-Knedlik è cler che la nova regenza a Berlin sto exnum augmentar las investiziuns en l’infrastructura dal pajais. Reparar e modernisar las vias ed ils binaris, miglierar la cuvrida e la spertadad da la rait d’internet e promover ina producziun d’electricitad indigena.
AfD avant success istoric
Fundada l'onn 2013 è la partida ‘Alternative für Deutschland’ sa mussada l'emprim sco moviment eurocritic, ma en il decurs dals onns è ella sa sviluppada adina pli fitg en direcziun da posiziuns pli extremas. Oz saja l’AfD ina da las pli radicalas partidas da la dretga da l’entira Europa, manegia Kai Arzheimer, professer a l’universitad da Mainz. Entant che autras partidas dretgas emprovian da zuppentar lur tendenzas antisemiticas e naziunalisticas mussia l’AfD adina pli cler tge tenuta ed ideologia ch’ella represchenta.
Tenor las retschertgas actualas pudess la partida, che vala tenor l'Uffizi federal da defensiun da la constituziun en parts sco extremista da dretga cuntanscher 20 pertschient da las vuschs tar las elecziuns dal Bundestag. Per far frunt a l’AfD cusseglia Arzheimer a tschellas partidas da betg empruvar da copiar ils temas e la strategia da la partida en dumondas da la migraziun, mabain da lantschar agens temas e da pronunziar las atgnas qualitads ed abilitads.
Relaziun cumplitgada
In cunfin da 360 kilometers, ina lingua communabla e circa 300'000 Tudestgas e Tudestgs che vivan en Svizra. Quai èn mo intgins chavazzins che descrivan la relaziun tranter la Svizra e la Germania. Ina relaziun che n’è betg adina stada simpla, gea ins pudess perfin dir, ella è savens cumplitgada.
Quai sa era l’anteriur ambassadur da la Svizra a Berlin, Tim Guldimann. Sez maridà cun ina dunna tudestga enconuscha el ils tics e splins dad omaduas varts dal Rain. La Svizra profiteschia dad ina gronda bainvulientscha da la Germania. Per lez sajan nus in zic curius ma simpatics.