Cun eleger il Bundestag decidan noss vischins il medem mument era davart la regenza futura. Suenter che la coaliziun tranter la SPD, Bündnis 90/Die Grünen e la FDP è crudada dapart han ils conservativs da la CDU e da la CSU bunas schanzas da metter il nov chancelier.
Autoland en la crisa
En la Marella dad RTR dain in sguard sin il sistem electoral da la Germania ed illuminain la situaziun economica dal pajais ch'ha – sper il tema da la migraziun – ina gronda influenza sin la decisiun da las electuras ed dals electurs. L'economa Geraldine Dany-Knedlik da l’Institut tudestg per la perscrutaziun da l’economia DIW vesa duas raschuns, pertge che la Germania è en ina recessiun: la conjunctura generala ch'ha laschà suenter ed ils deficits structurals. Ella menziunescha che la concurrenza internaziunala saja vegnida pli severa.
Nus savain che gist interpresas tudestgas en l'industria d'autos han gronda fadia sin il martgà internaziunal. Qua è cunzunt la cumpetitivitad creschenta dals producents chinais ina gronda sfida.
Perquai dovri in program d’investiziun per megliurar l’infrastructura ed uschia render pli attractiv la plazza economica tudestga, di Dany-Knedlik.
Status da relaziun: igl è cumplitgà
La relaziun tranter ils Svizzers ed ils Tudestgs è marcada d'ina lunga istorgia che n’è betg adina stada simpla. Cun Tim Guldimann – istoricher ed anteriur ambassadur da la Svizra a Berlin – analisain l’istorgia per part sanguinusa dals dus pajais. Maridà cun ina dunna da la Germania ha el era gia fatg sias experientschas cun la tenuta pulit directa dals Tudestgs.
Qua datti situaziuns nua ch'jau ditg: Na sajas betg uschè agressiva. Ella respunda lura: Jau ditg mo, tge ch'è chaussa. Ed jau di lura: Apunta.
L’ascensiun da l’AfD
In auter tema è l’ascensiun remartgabla da la partida «Alternative für Deutschland». Naschida avant dudesch onns sco partida euro-sceptica ès l’AfD sa sviluppada tar ina partida en parts radicala da dretga che pudess tenor retschertgas recaltgar 20 pertschient da las vuschs.
Tenor Kai Arzheimer da l’universitad Mainz ed expert per partidas da la dretga en Europa è l’AfD ina da las pli radicalas partidas da la dretga. Entant che autras partidas da quest spectrum politic emprovian da zuppentar lur tendenzas naziunalisticas e radicalas, mussia l’AfD adina pli cler sia tenuta e posiziun.
Per far frunt stuessan tschellas partidas betg empruvar dad imitar las posiziuns da l’AfD en l’immigraziun ed asil, mabain metter ils agens temas en il center dal cumbat electoral.
Copiar l’AfD gidia mo a lezza e na portia betg dapli vuschs a l’atgna partida è Arzheimer persvas.