Igl è la segund gronda elecziun democratica dal mund: Questa fin d’emna èn clamads 360 milliuns umans da 27 stadis a las urnas. Els han dad eleger lur represchentantas e represchentants en in parlament cuminaivel – il parlament da l'Uniun europeica, UE, a Brüssel.
L'Uniun europeica intunescha en la rait, quant impurtant ch'igl è dad ir a vuschar – «nizzegia tia vusch, uschiglio decidan auters per tai» – e ch'i va per proteger la democrazia.
Las spetgas: In parlament main verd e pli dretg
Cun lur vusch pon las votantas ed ils votants er dir tge Europa ch'els giavischan en l'avegnir. Duai l'Europa esser pli sanestra, verda u liberala? Tenor Andreas Reich, correspundent per la televisiun SRF a Brüssel, vegn spetgada plitost ina «elecziun da correctura» da las ultimas elecziuns ed uschia in parlament main verd e main sanester.
Sco correspundent per la televisiun SRF rapportescha Andreas Reich davent da Brüssel da tut quai che curra e passa en l’Uniun europeica. Il schurnalist è giurist ed expert per dretg europeic ed è vegnì tschernì il 2022 per quest post.
Anzi, las discussiuns sin champ politic mussan cleramain ad in svilup en ina direcziun – e quai è a la dretga. En in mund europeic, nua ch'ils temas segirezza e migraziun preoccupeschan a milliuns da persunas, s'auzan las forzas da la dretga e da la dretga extrema cun nova vehemenza.
Questas tendenzas politicas vegnan discutadas en tut l'Europa. Betg perquai ch'il parlament europeic cun ses 720 delegads e delegadas avess tanta pussanza, ma perquai che l'elecziun vegn valitada sco «barometer per differentas elecziuns naziunalas», di Alexander Reich en discurs cun la Vita e cretta.
Las religiuns cristianas – religiuns dominantas en l'UE, dentant betg en la politica
In emprim indizi a l'impurtanza da las religiuns per il parlament da l'Europa mussa ina tschertga sin sia pagina en la rait. Ils resultats tar la noziun «religiun» – nagut. In'impressiun, che Andreas Reich sco observatur da la vita politica da l'UE conferma. Sin la dumonda, tge rolla che la religiun gioga en questa uniun da pajais che sa refereschan en ina u l’autra maniera sin ragischs cristianas di el «betg ina gronda».
En singuls pajais, sco per exempel en la Pologna cun sia tradiziun catolica, saja quai bain different. Ma en la discussiun ed en las decisiuns da l'Europa unida na saja la religiun insumma nagin factur decisiv – er sche passa 72,8% dals umans en l'UE sajan tenor cifras dal 2018 dad ina religiun cristiana.
