Mintga dieschavla persuna dal mund è clamada a partir da questa fin d'emna a l'urna. Sche l'India elegia èn clamads 956 milliuns a dar lur vusch. Las elecziuns en la pli gronda democrazia dal mund duran sis emnas. Las urnas vegnan transportadas cun helicopters, bartgas e perfin elefants tar las votantas ed ils votants, scrivan las agenturas da novitads.
La Vita e cretta al telefon cun Mumbai
Per la Vita e cretta dat l’anteriur schurnalist e diplomat svizzer Bernard Imhasly in sguard en il mintgadi dal pajais, nua ch'el abita dapi 40 onns.
In pajais che è pli e pli bullà da ses primminister Narendra Modi. Ensemen cun sia partida Bharatiya Janata Party BNP vul el mantegnair u meglier ditg augmentar sia pussanza anc en l'actuala e cun ina proxima, ina terza perioda d'uffizi.
Narendra Modi – in carismatic, che regna cun maun da fier e persvasiun da hindu
Era sche 956 milliuns umans da tut l'India èn clamads ad eleger favorisescha lur primminister cleramain ina part dad els, ils hindus. Quai fa el cun in naziunalissem adina pli ferm e pli evident. L'ultima gronda demonstraziun da sia pussanza è stada l'inauguraziun dad in tempel hinduistic nov – construì sin las ruinas dad ina moschea.
L'India da Modi en maletgs
-
Bild 1 von 12Legenda: Per ti cun ils pli pussants – sco primminister da la pli gronda democrazia dal mund è Narendra Modi in giast bainvesì, er en la Chasa alva a Washington tar Jill e Joe Biden. Keystone -
Bild 2 von 12Legenda: In ferm tranter ils ferms – ils umans en l’India èn superbis che lur primminister vegn prendì serius en la politica mundiala. RTR
-
Bild 3 von 12Legenda: Bainvesì pervi da sia forza economica – Modi tar in inscunter dals G20 il 2023 a New Delhi en l’India cun il president da la Banca mundiala Banga ed ils politichers Lula (BR), Ramaphosa (ZAF) e Biden (USA). Keystone
-
Bild 4 von 12Legenda: Per ti er cun «ils auters» – l’India da Modi è er in partenari bainvegnì tar ils stadis BRICS cun Lula da Silva (BR), Xi Jinping (CHI), Ramaphosa (ZAF), Modi (IND) e Lavrov (RUS). Keystone
-
Bild 5 von 12Legenda: Modi sco giast d’onur a Paris – il 25avel anniversari dal partenadi economic tranter la Frantscha e l’India è vegnì celebrà cun pumpa e simbolica ils 14 da fanadur 2023. Keystone
-
Bild 6 von 12Legenda: Cumbattant electoral dapi 22 onns – dapi tant temp è Narendra Modi en ils uffizis ils pli auts en l’India e n’ha anc mai perdì in’elecziun. Keystone
-
Bild 7 von 12Legenda: S'inscenar sco Hindu – durant ina visita en il Himalaya celebrescha Modi rituals ed uraziuns hinduisticas davant culissa spectaculara. Keystone
-
Bild 8 von 12Legenda: In tempel nov sin las ruinas dad ina moschea – l’inauguraziun dal tempel da Ram ad Ayodhya il schaner 2024 vegn taxada sco demonstraziun da pussanza da Modi. Keystone
-
Bild 9 von 12Legenda: Ina chargia greva – l’inflaziun e la povertad paisan en l'India e la democrazia n’ha betg anc purtà la prosperitad giavischada. Keystone
-
Bild 10 von 12Legenda: «Democrazia en privel» – giuristas e giurists sa dostan encunter la regenza da Modi davant il parlament a New Delhi il mars 2023. Keystone
-
Bild 11 von 12Legenda: Resistenza cun giginar – aderents da l'oppoisziun protesteschan cun giginar cunter l'arrest dal schefminister da New Delhi, ch'è en oppsiziun cunter Modi. Keystone
-
Bild 12 von 12Legenda: Omagi tar il memorial da Mahatma Gandhi – cun sia politica da pussanza che favorisescha il naziunalissem hinduistic s’allontanescha Modi dad in dals confundaturs dal stadi modern, dal pacifist Gandhi. Keystone
Era sche la constituziun da l'India na permetta betg quai è la pasch religiusa tranter las differentas confessiuns en India tras questa preferenza clera da Modi en privel. In gieu cun il fieu, conferma Bernard Imhasly en Vita e cretta.