In giavisch da Christian Lohr fiss ch'ins n'avess betg pli da discurrer il 2024 davart rampas ed ascensurs, mabain ch'ins pudess ir vi da auters problems structurals che fatschentan persunas cun in impediment. Dentant vegnan fabritgadas novas portas da segirezza per entrar en la Chasa federala. Ma, cun sutga cun rodas na possian ins betg atras, di Christian Lohr. Dapi il 2011 fa Christian Lohr politica en il Cussegl naziunal per il chantun Turgovia. Il politicher da l'Allianza dal Center cumbatta cun sia politica fermamain per ils dretg da persunas cun impediments. In da ses puncts culminants era la sessiun per persunas cun impediments che ha gì lieu l'onn passà. El ha presidià la sessiun ed è persvas che quella haja midà la Svizra.
La sessiun per persunas cun impediments haja dà visibilitad als temas che fatschentan ed hajan motivà persunas cun impediments da candidar per posts politics, ma era votantas e votants d'eleger persunas cun impediments. Anc mai èn las persunas cun in impediment stadas represchentadas uschè bain en il parlament sco en la legislatura actuala. Cun Christian Lohr, Philipp Kutter ed Islam Alijaj èn trais politichers cun differents impediments vegnids elegids. Quai fa grond plaschair a Christian Lohr. El di che las partidas politicas stoppian uss era empruvar da daventar pli inclusivas. Votantas e votants hajan fatg il pass inizial cun eleger els trais. El sa però era che quai dovra probablamain pazienza.
La medema chasa federala, ma d'in'autra perspectiva
Sco Christian Lohr politisescha era il cusseglier naziunal da Turitg Philipp Kutter per l'Allianza dal Center a Berna. Elegì è el vegni il 2018. L'onn 2023 ha Philipp Kutter alura gì in grev accident cun ir cun skis a Scuol. Dapi lura è el tetraplegicher ed avisà sin la sutga cun rodas.
Cun l'accident n'è betg mo sa midada sia mobilitad, mabain era sia politica. Dasper ils dossiers politics da famiglia, educaziun ed economia s'occupa el ussa era da l'inclusiun. Far politica cun in impediment na saja betg adina simpel, di el. Gist quai che succedia davos las culissas saja daventà auter. Tar in lunch en pè per exempel saja difficil da sa participar a la discussiun sch'ins saja en sutga cun rodas. Perquai ha el uss ina sutga cun rodas cun in lift che auza ad aut el. Tut quai che capita spontan saja daventà pli difficil, declera el. Ins na possia era betg ir insanua be svelt. I stoppia perquai vegnir normal ch'ins n'haja betg adina da far attent ch'ins dovria in access senza barrieras. Areguard quai stoppian era las partidas vegnir sensibilisadas pli fitg.
Inclusiun en la politica
-
Bild 1 von 5. Philipp Kutter, Islam Alijaj e Christian Lohr èn trais politichers cun in impediment en Chasa federala. Uschè bain n'èn persunas cun in impediment anc mai stadas represchentadas en Chasa federala. Bildquelle: Keystone.
-
Bild 2 von 5. Philipp Kutter è vegni elegi il 2018 en il parlament. Il 2023 ha el gi in grev accident cun ir cun skis ed è dapi lura avisà sin la sutga cun rodas. Bildquelle: Keystone.
-
Bild 3 von 5. Causa l'accident era el absent in pèr mais. Cura ch'el è turnà per far vinavant politica ha il parlament fatg in grond bainvegni ad el. Bildquelle: Keystone.
-
Bild 4 von 5. Senza mauns e cun chommas defurmadas è Christian Lohr vegnì sin il mund. Ma quai n'ha mai tegnì si el da s'engaschar. El è dapi il 2011 en il Cussegl naziunal. Bildquelle: Keystone.
-
Bild 5 von 5. I dovra pazienza, ma il patratg da pudair gidar autras persunas dat ad el la forza da cumbatter e da cumbatter per dapli inclusiun. Bildquelle: Keystone.