Er il minister da sanadad Grischun Peter Peyer ha suttascrit la petiziun per salvar la staziun intensiva per uffants en l'Ospital chantunal a Cuira. Che bunamain 25'000 persunas (stan 22-11) han suttascrit la petiziun, mussa tge muntada che questa staziun intensiva haja per la populaziun.
Sco cusseglier guvernativ grischun e minister da sanadad è el dentant in zic en in'autra posiziun. Mo el di er cleramain: Politicamain na possia la regenza grischuna betg far bler encunter il plan da stritgar ils tractaments spezialisads, sco per exempel quel d'uffants. Els possian cumbatter e far lobbying, ma actualmain betg dapli.
Dapi il 2009 è il Grischun numnadamain, sco er tut ils auters chantuns part da la rait interchantunala per medischina autspezialisada.
Questa rait ha fatg senn, mo uss va quella en ina direcziun che metta en privel il provediment da basa e quai n'è betg in bun svilup.
En questa rait datti in gremi spezialisà d'experts, per gronda part cun connex universitar che fa propostas. Ed in segund gremi da 10 persunas che prenda las decisiuns. Part èn là ils tschintg ministers da sanadad cun ospitals d'universitad plus tschintg ulteriurs ministers da sanadad (tranter auter er il Grischun cun Peter Peyer). Cun ina decisiun definitiva tge che capita cun differentas purschidas da la medischina autspezialisada a Cuira èsi da spetgar la primavaira 2024.
Tge capitass suenter?
Suenter pudess sulettamain l'Ospital chantunal dal Grischun trair vinavant la decisiun tar il tribunal federal. Il chantun Grischun savess sco ultim pass, anc bandunar la rait interchantunala per medischina autspezialisada. Questa decisiun stuess dentant vegnir fatga dal Cussegl grond.
Ospital chantunal vul mantegnair la staziun intensiva per uffants
L'emna passada ha l'Ospital chantunal dal Grischun lantschà la petiziun per salvar la staziun intensiva per uffants en l'Ospital chantunal a Cuira. En l’avegnir duain numnadamain ils ospitals a Turitg ed a Son Gagl tractar ils uffants e las dunnas cun gravidanzas da ristga or dal Grischun e da la Svizra sid-orientala. Quai malgrà che l'ospital chantunal surpiglia gia oz regularmain uffants da tut la Svizra. Mintga minuta saja decisiva, sch'i va per la vita d'uffants e perquai veglia l'ospital chantunal s'engaschar che la staziun intensiva per uffants vegnia manada vinavant a Cuira.
Concret vul la petiziun che l'ospital chantunal haja era era vinavant l'incumbensa da surpigliar:
- tgira intensiva da naschientschas prematuras e la neonatologia
- traumas grevs e politraumas inclusivamain traumas dal tscharvè tar uffants e giuvenils
- oncologia d'uffants, sco fin uss, sco staziun da satellit da l'ospital d'uffants da Turitg
Medischina autspezialisada
La tgira intensiva d'uffants tutga tar l'uschenumnada «medischina autspezialisada» (HSM). Quella è organisada sin nivel federal. In gremi naziunal definescha tge che tutga tut tar la medischina autspezialisada. Alura vegnan las incumbensas repartidas sin ils differents ospitals.
Per l'Ospital chantunal a Cuira n'è la pratica actuala, tge che tutga tut tar la medischina autspezialisada betg correcta, perquai ch'adina dapli parts vegnian definidas sco HSM, senza correspunder a las qualificaziuns necessarias. Uschia vegnia adina pli grev per ospitals centrals, che n'èn betg en in chantun cun ina universitad, da porscher las prestaziuns. Quai muntia era che la populaziun da quests chantuns sto far lungs viadis per ils tractaments. En il cas concret fissan quai oravant tut dunnas cun gravidanzas da ristga.
Era a Berna è la centralisaziun dals servetschs da HSM in tema. Uschia ha il cusseglier dals chantuns Martin Schmid inoltrà ina moziun.
