La pandemia da Corona ha laschà regurdientschas en la vita da tut las persunas che sa regordan da quests temp particular. Regurdientschas custaivlas - ma era regurdientscha che han laschà uridas. Bleras persunas discurran schizunt d'in temp avant – e d'in temp suenter la pandemia da Corona.
Per il magazin da la dumengia «Vita e cretta», èn Claudia Tomaschett e Gaby Degonda s'inscuntradas per laschar reviver insaquantas experientschas da l'emprim temp da pandemia. Claudia Tomaschett era entrada il schaner 2020 sco nova manadra da la chasa d’attempads a Glion – e Gaby Degonda aveva surdà curt suenter la mort da ses bab, sia mamma Teresa en la chasa d’attempads a Glion.
Quest mument èsi stà cler, qua arriva insatge pli serius
«Sche jau avess savì tge che am spetgava n'avess jau betg surpiglià questa chasa», di Claudia Tomaschett guardond enavos sin il cumenzament da ses uffizi. Oz guarda ella dentant enavos cun superbia sin il persunal da la chasa e sin ses team da la direcziun da la chasa, d'avair dà dumogn a tut ils obstachels e las restricziuns dal temp da Corona. Per prevegnir a temps intscherts avevan ins decidì d'empustar mascrinas. Ma i na deva naginas mascrinas sin la fiera.
Malgrà tut quai che mia mamma aveva traversà, aveva ella in surrir sin sia fatscha
Cun ina nova situaziun da vita è era Gaby Degonda vegnida confruntada il cumenzament da la pandemia. Curt suenter la mort da ses bab il matg 2020, è sia mamma Teresa sa chasada en la chasa d'attempads. In temp fitg cumplitgà che sfurzava dad isolar novas cussadentas e cussadents. Distanza ed encreschadetgna tutgavan tar la vita quotidiana. L'emprima visita a sia mamma è stada pussaivla sur l'entrada externa cun access tar la chaplutta. La stad 2020 èn las emprimas schluccadas succedidas. Il curtin da la chasa d'attempads era sco in pitschen paradis per cussadentas e cussadents e lur visitas. Là pudevan ins sa mover senza mascrina, ma risguardond las distanzas.
Deplorablamain è lu era quella stad passada. L'enviern 2020/21 ha purtà blera naiv ed ina nova e ferma unda da Covid cun tut sias consequenzas. D'ina vart la figlia che ha pers la mamma causa il virus, da l’autra vart la manadra da «La Pumera» cun sia enorma responsabladad vers il persunal da tgira e vers abitantas ed abitants da la chasa. «Nus eran tuts en la medema bartga e nus avain tratg tuts ensemen en la madema direcziun», sa regorda Claudia Tomaschett. Las experientschas da las duas dunnas èn mo in pitschen exempel da millis autras istorgias ch'èn vegnidas scrittas durant il temp da pandemia.
