Analisas, cifras, valitaziuns – expertas ed experts vegnan betg be a pled di per di, ma ura per ura. Cun l'intschertezza vegn er si tema, dentant han bleras e blers chattà vias per vegnir a frida cun la situaziun. La situaziun da squitsch permanent durant las fasas pli restrictivas da la pandemia.
Co va la glieud enturn cun la pandemia?
Er ils chantuns tschertgan soluziuns. Il Grischun ha cumenzà a testar mordio, quai sco emprim chantun insumma. In onn pli tard era pronta la vaccinaziun. Tuttina eran ils ospitals occupads ferm cun pazientas e pazients da corona.
La bilantscha 5 onns pli tard
Tschintg onns suenter l'emprim cas da corona en Grischun ha il chantun preschentà in studi sur da quest temp. Durant ils dus onns da pandemia hajan ins constatà dapli mortoris en Grischun ch'usità. Er in sguard en la statistica naziunala mussa che bleras persunas èn mortas il 2020 pervia da la malsogna.
L'experientscha da la pandemia ha laschà enavos fastizs durabels en la societad.
Er oz circulescha il virus anc, el vegn dentant resumà cun autras malsognas dal sistem respiratoric.
Consequenzas per la societad
Sper sfidas en il sistem da sanadad preoccupa il cusseglier guvernativ Peter Peyer anc in'autra chaussa: ils foss ch'èn s'averts en la societad. Tschertas persunas ch'hajan mess en dumonda las mesiras e la scienza durant la pandemia, volvian ussa era ils fatgs en la guerra en l'Ucraina. Quai fetscha quitads, di Peter Peyer.
Pia: Er sche la pandemia è passada, datti er oz anc consequenzas. Saja quai per il sistem da sanadad, per las autoritads e lur leschas, dentant er per mintga persuna ch'ha gì da cumbatter durant quel temp u ch'ha forsa emprendì insatge nov. Il virus Covid-19 ha marcà fermamain ils ultims onns – saja quai negativ, dentant (sporadicamain) er positiv.
Per ina proxima pandemia vegn Peter Peyer ad esser preparà, silmain quai che pertutga ses hobi. Durant la pandemia haja el cumprà uschè blers cudeschs da cuschinar sco anc mai. In cudesch che stat spezialmain a cor ad el porta il titel «A casa». En quel cudesch dettia in recept cun il titel «Nicht verzweifeln, Freunde». I giaja qua per far ina buna cotletta «Ins duess ir a cumprar il toc charn tar il mazler, e sch’il toc saja sur 600 grams saja quai bun – e quai ma plascha», di el cun in surrir.
Consequenzas e mesiras dals servetschs psichiatrics
L’Uffizi federal da sanadad ha fatg studis ed intercurì las consequenzas da la pandemia sin la sanadad psichica. Igl è grev dad eruir precis, quants ch'han patì e quant fitg che la pandemia ha influenzà. Ils studis mussan però trends. In da quels è che surtut persunas giuvnas han patì psichicamain durant la pandemia. Dapi la pandemia datti adina dapli persunas giuvnas ed uffants che han problems psichics en il Grischun.
Naziunal ed era internaziunal èsi era uschia. Tenor Heidi Eckrich la directura medicinala da la psichiatria d’uffants e giuvenils dal Grischun saja grev da dir, sch’il motiv saja propi stà la pandemia. Tge ch’ella observà en sia lavur è che surtut il mund digital saja daventà ils davos onns in grond factur. Quel haja survegnì dapli schlantsch entras la pandemia. Sche quest svilup en il mund digital na fiss betg era capità senza pandemia, simplamain pli paun, na pon ins oz però betg dir. Era il factur scola haja fatschentà blers uffants e giuvenils durant la pandemia. Per tscherts eri perfin positiv da na betg «stuair» ir a scola, uschia ch'il return enavos en la vita da mintgadi è stà grevs.
Surtut per uffants e giuvenils en famiglias cun problems psichics u problems finanzials saja la pandemia stada in factur da stress en pli. Las cifras da giuvnas e buobas che dovran sustegn psichic e pateschan da temas e da depressiuns e creschids ils davos onns.
Long-covid anc adina ina sfida
Avant curt ha il Cussegl grond decidì ch'i duess dar dapli sustegn en Grischun per persunas cun long-covid.