Analisas, cifras, valitaziuns – expertas ed experts vegnan betg be a pled di per di, ma ura per ura. Persunas sco Daniel Koch – atgnamain uffiziants nunenconuschents en in uffizi – daventan figuras omnipreschentas.
La derasaziun dal coronavirus fa midar la situaziun ad in midar. Cun l'intschertezza vegn er si tema. Ed adina puspè èsi stà da chattar vias – per part era novas – per vegnir a frida cun la situaziun.
Claudia Tomaschett – Navigar tras la crisa cun la chasa da tgira «La Pumera»
Claudia Tomaschett è dapi il schaner 2020 la manadra da la chasa da tgira «La Pumera» a Glion. Ed ella sa regorda anc sco sch’i fiss oz dal mument ch’ella ha realisà ch’ins sto prender serius il coronavirus: Gia la fin schaner na saja quai betg pli stà pussibel d’empustar mascrinas. Pia be curt suenter ch’ella ha cumenzà la lavur a la testa da la chasa da tgira.
Uschia haja el stuì emprender svelt da navigar questa bartga. Ella n’haja anc betg enconuschì il manaschi, betg il persunal ed er betg cussadentas e cussadents. Uschia haja ella svelt stuì emprender:
Sch’ins guarda, tge ch’ins ha tut fatg lura, pon ins oz be scurlar il chau. Quai era in auter mund.
Il scumond da visitas haja fatg greva la situaziun. Tuttina hajan tant cussadentas e cussadents sco era la parentella mussà chapientscha. En il discurs reflectescha Claudia Tomaschett er aspects positivs: Malgrà las sfidas, haja la crisa rinforzà la collavuraziun en il team e meglierà las normas d'igiena. Vinavant saja ina gasetta mensila naschida ord ils regulars fegls d’infurmaziun ch’ella ha introducì durant la pandemia.
Cun la savida dad oz fiss Claudia Tomaschett pli critica envers las decisiuns superiuras e surpigliass dapli responsabladad persunala, tradescha ella. La pandemia haja mussà che soluziuns praticas sajan savens meglras che directivas teoreticas.
Fabiana Sac – Sfidas emoziunalas sin la staziun da pandemia
Ina che ha lavurà durant la pandemia di per di cun persunas cun severas infecziuns era Fabiana Sac. La tgirunza era lura sin la staziun da pandemia da l'ospital chantunal dal grischun. I saja surtut era stà in temp emoziunal sin la staziun.
Surtut al cumenzament eri magari in zic in frust. Ils pazients e las pazientas dumandavan: Tge è quai? Tge gida? Tge poss jau far? E nus na savevan a l’entschatta era betg. Uschiglio savain nus adina, tge dir e pudain adina gidar.
Tenor Fabiana Sac saja la collavuraziun en l’ospital chantunal durant la pandemia stada buna e l’infurmaziun saja ida svelt. Cunquai ch’i n’era betg dal tut cler quantas persunas che dovran sustegn eri planisà avunda persunal per la staziun da pandemia. Uschia aveva ella era adina avunda temp per ils pazients e las pazientas e per declerar la situaziun.
Marcus Caduff – il «Tamazi» legendar
Tamazi e territoris da skis – quai è forsa ils chavazzins che vegnan endament sch’ins patratga vida cusseglier guvernativ Marcus Caduff en connex cun la pandemia. Oz na sa el gnanc pli, pertge ch’el aveva da lezzas uras titulà il Cussegl federal sco «tamazi». Pledentads vegn el dentant anc adina sin quest pled.
Nus avain entupà ina giada Alain Berset pli tard a Berna. Lura avain nus tematisà las episodas da quai temp e pudì rir ensemen surda quai temp.
El era s’engaschà ferm per ch'ils territoris da skis e las terrassas da las ustarias possian restar averts. Da la decisiun da laschar avert è el anc oz persvas.
Atgnas vias è il Grischun era ì, quai che pertutga ils tests da massa. Là è il chantun Grischun stà pionier. Ina decisiun ch’è era crudada, perquai ch'il squitsch da l’economia ed il turissem era grond.
