5 onns Corona - Myriam Egli e long-Covid – in cumbat infinit

Entant ch’il mund para da sa avair remess da Corona na ha la pandemia per millis e millis da persunas en Svizra mai prendì fin. Ellas cumbattan cunter la lunga sumbriva da Corona, cunter long-Covid – sco Myriam Egli da Sagogn.

In cumbat dapi 4 onns

La coiffeusa ha gì corona avant quatter onns. Suenter in per emnas fermamain malsauna emprova ella da turnar a la lavur, ma adumbatten. I na vegn betg meglier, mabain mender. Dapi lura patescha ella da long-Covid.

Avant dus onns han ils Cuntrasts realisà in film cun Myriam Egli. Alura era ella gia scritta malsauna e retirava l’Assicuranza d’invaliditad. Ella aveva cunzunt mal il tgau, mal la musculatura e las giugadiras. Ella era fitg stancla ed aveva tuttina difficultads da durmir.

Dad ina vita en cumpagnia ad ina vita solitaria

Il mender era dentant ch’ella – avant la malsogna ina persuna zunt communicativa e da cumpagnia – na vertiva pli blera glieud, la canera e la glisch. Sch’ella aveva in bun di, era ella – malgrà ses mals – capabla da far pitschnas spassegiadas cun ses dus chauns.

Uss, dus onns suenter quella visita, na vai betg meglier cun ella mabain mender. Avant in onn e mez ha ella gì in segund infect che ha chaschunà bleras inflammaziuns. Pervia da las enormas dolurs ha ella stuì far ina cura intensiva da cortison e lezza ha prendì ad ella la forza.

Betg meglier, ma anc mender

Ella n’ha betg pli forza en la musculatura, las chommas entschaivan a tremblar. Oz sa ella far a pe maximalmain distanzas da 75 meters.

Ils mals permanents, il fatg ch’i va mender e che la medischina ha era oz anc nagin remedi deprimescha. Ella na saja betg depressiva, ella haja dentant fasas depressivas. I dettia muments fitg stgirs. En quellas rusnas saja magari impurtant dad era savair tschantschar sur dad EXIT.

Ella ha dentant prendì la decisiun da sbatter per ses uffants. Els èn anc qua, els van anc bleras vias e dovran forsa la mamma.

Or da l'archiv: