Ils 26 da mars 2000, curt suenter las 08:00 da la damaun, han sajets disturbà la pasch en il restaurant Rosenhügel a Cuira.In giuven cun in schluppet d'assagl, ha drizzà sia arma or davent da ses balcun visavi sin la terrassa dal restaurant. Uras a la lunga ha la polizia sinaquai empruvà da schliar la situaziun, ma adumbatten. La finala ha in sajet mortal da la polizia terminà l'entira acziun, l'agitaziun ed il privel.
Tgi era il delinquent?
El era in giuven da 22 onns che viveva a Cuira ed aveva lavurà sco mazler. La relaziun cun ses bab era difficila ed el consumava regularmain drogas. Amis e parents han descrit el sco reservà e betg violent. El era però fascinà da violenza en films. Avant l'attentat è el sa retratg adina pli ferm.
Perspectivas psicologicas e criminologicas
La criminologa Britta Bannenberg, ina experta per amocs, declera che tals delinquents èn savens solitaris, malcuntents cun lur vita e senza perspectivas cleras. Disturbis psichics ed influenza da drogas pon er giugar ina rolla. La cumposiziun da quests facturs po manar ad in patratg privlus che culminescha en in amoc.
Be trais mais avant l'amoc aveva ella cumenzà sco reportra tar il Schurnal regiunal da SRF. Bain aveva ella gia rapportà da demonstraziuns cunter il WEF ma quella situaziun era tut insatge auter.
Suenter avair survegnì in telefon dals producents è ella sa messa sin via vers il parcadi da las pendicularas da Brambrüesch, senza savair tge che capitia. Damai che l'attentader na sa chattava betg lunsch davent n'èri era betg cler sche quel pudess forsa sajettar er sin schurnalists ed autras persunas sin il parcadi.
Live al radio cura ch'il cumandant decida il culp final
Intginas uras pli tard ha la Polizia chantunala envidà ad in'orientaziun da medias. Ed en il mument ch'ins auda Romana Costa al radio (lura anc DRS 1), piglia betg lunsch davent, il cumandant da la polizia da lez temp, Markus Reinhardt la decisiun da lubir il culp final – sco ultima ratio. Ina decisiun cun consequenzas fatalas – Ewald K. vegn sajettà.
In cas che ha fatschentà Romana Costa ed ils auters schurnalists e schurnalistas anc emnas e mais suenter. Er perquai ch'il cumandant ha stuì ir davant dretgira. Anc oz regordia la chasa da pliras auzadas sin il Rosenhügel ella vid ils 26 da mars 2000.
Il rom giuridic dal «culp final da salvament»
L'acziun da la polizia a Cuira ha terminà cun in uschenumnà «culp final da salvament» ch'ha mazzà il delinquent. Questa decisiun sveglia dumondas giuridicas davart cura ch'il stadi ha il dretg d'applitgar violenza mortala. Patrice Martin Zumsteg da la ZHAW è giurist e sa fatschentà explicitamain cun l'uschenumnà culp final. El accentuescha ch'i saja necessari d'avair reglas cleras per garantir segirtad giuridica a las persunas sco il cumandant da polizia che han da decider en talas situaziuns. Las leschas svizras ed er la lescha da polizia dal chantun Grischun laschan però spazi d'interpretaziun e na regleschan betg cleramain questa situaziun. Uschia ha er il cumandant da polizia ch'ha dà il cumond per il sajet final ils 26 da mars 2000 stuì ir suenter davant dretgira pervi da «omicidi fatg aposta» (vorsätzliche Tötung). La dretgira ha approvà sia decisiun.
Consequenzas e reflexiuns
Il cas ha laschà enavos inqual fastiz profund tar blers involvids. Policists ch'eran en acziun lezza giada discurran dad in dals pli grevs dis da lur vita. La dumonda dal «daco» resta per blers e bleras senza resposta ed è fin oz in burdi per ils survivents e las forzas d'intervenziun. Il cas mussa la cumplexitad da tals eveniments e las sfidas che quels muntan per la societad.
Facit
L'amoc da Cuira è in exempel schoccant ch'i dat violenza betg previsibla che po resultar da mancos individuals e socials. El regorda nus da la necessitad da prender serius la sanadad psichica e da crear roms giuridics che resguardan tant la protecziun da la populaziun sco er ils dretgs da l'individi.