La criminalitad organisada è realitad en Svizra. Sper la mafia taliana èn bleras autras gruppaziuns activas. Ins è anc vi d'examinar la situaziun endretg. Ditg han ins sutvalità il problem en Svizra. La Svizra è attractiva per gruppaziuns mafiusas di Nicoletta Della Valle: «Nus essans entamez Europa, avain ina politica stabila ed essans in pajais ritg». Ins stoppia era vesair che la Svizra è dapli che «be» in lieu per lavar daners. La Svizra è dapli ch'ina banca, di la directura dal Fedpol.
Expertas din a nus che la segunda lingua da la mafia è tudestg svizzer
La Svizra è in hub per affars tranter auter cun armas, umans e drogas. Ins stoppia vegnir davent da l'idea che la Svizra na saja betg pertutgada uschè ferm sco auters pajais. Criminalitad organisada è dapertut. Là nua ch'ins guardia chatta ins ella.
Criminalitad dascusa
Gruppaziuns da la criminalitad organisada èn dascusas. Las mafias n'èn betg avertamain violentas. I dat forsa in accident u in suicidi e pir cura ch'ins guarda meglier ves'ins ch'i era forsa tuttina betg in accident.
Nus n'avain anc naginas schurnalistas ni derschadras sajettadas sin via
La criminalitad organisada è dascusa era per pudair far ses affars senza pli gronds disturbis. Perquai sto esser nossa finamira da disturbar ella. «Nus stuain, precautamain, vegnir davent da l'illusiun che nus pudain abolir tala criminalitad. Tant dapli stuainsa disturbar ella.» di Della Valle.
Dapli resursas fan da basegn
D’intercurir cas da la criminalitad organisada dovria temp, di la scheffa dal Fedpol. Causa ch'i mancan resursas – daners e persunal – saja impussibel da pudair intercurir tut quai ch'ins stuess. La politica stuess metter a disposiziun tenor Della Valle dapli meds. Cun quai che la criminalitad organisada e dascusa n'è il squitsch dentant betg uschè grond. Acts criminals sco enguladitschs u rowdys èn pli visibels e survegnan dapli attenziun.
Dentant èsi er ina sfida che divers auters profiteschan da la criminalitad organisada. Nicoletta Della Valle numna quai l'infiltraziun da l'economia legala. Las persunas che sa participeschan a gruppaziuns mafiusas sajan era integradas en Svizra fitg bain. Per part en la terza u quarta generaziun. Igl èn citadins e citadinas ch'èn involvidas en la societad ed infiltreschan plan a plan economia e politica.
1'606 fegls da notas che n'èn betg vegnids stampads per laschar tunar las cumposiziuns scrittas, mabain per laschar tunar las cassas. Las notas èn vegnidas tramessas per posta da pachets da l’Ecuador en Svizra. Il pachets cuntegnevan dentant dapli che mo melodias finas: numnadamain cocain.
En ina cuschina da cocain, installada en in'abitaziun da vacanzas a Laax, vulevan plirs umens extrair da l’onn 1993 il cocain pur dals fegls. Profitar avess stuì in cartel da drogas sidamerican. Ma in agent secret ha midà l’istorgia.
La pli nova episoda da True Crime Grischun dat plinavant era in’invista en il problem da la criminalitad organisada en Svizra e mussa il cumbat da la directura da l’Uffizi federal da polizia (Fedpol) Nicoletta Della Valle cunter la mafia.
