Las vischnancas cun ils pli blers delicts per 1'000 abitantas:
- Cuira: 103,6 delicts per 1000 abitants
- Zizers: 80,5 delicts per 1000 abitantas
- Tschappina ha in «aut dumber da delicts», cumpara en la statistica cun ses 140 abitants dentant en la gruppa «ulteriuras vischnancas».
Il 2024 èn sa reducids en Grischun ils delicts da violenza registrads per 2% sin 686 cas. Tenor la pli nova statistica criminala da la polizia èn ils delicts da violenza greva sa reducids per 9% sin 39 delicts. Da tut ils delicts da violenza munta la part da violenza applitgada a 5,7%.
Dals total 39 cas da violenza greva applitgada èsi 1 delict da mazzament empruvà, 32 cas da blessuras corporalas grevas e 6 violaziuns.
Svizra: augment massiv da delicts da violenza e cybercriminalitad
En Svizra hai dà dapli delicts l’onn passà. Quai resulta da la statistica criminala da la Confederaziun 2024. Concret saja il dumber s’augmentà per 8% sin radund 563'633 delicts. En egl dettia ch’ils cas da cybercriminalitad sajan s’augmentads per 35%.
Il dumber da grevs delicts da violenza en Svizra saja s’augmentà per 19,4% sin 2'456 cas. Il pli grond augment han ins registrà qua tar la blessura corporala greva (+16,9%) e la violaziun (+29,4%)
Quest rapport vala sco indicatur per la situaziun da segirezza en Svizra. Cumpareglià cun l' augment da la populaziun è la criminalitad creschida surproporziunalmain l'onn 2024.
Delicts da violenza greva s'augmentan vinavant
Cun in total da 48'943 delicts da violenza è vegnì registrà l'onn 2024 in augment da 3,3% en cumparegliaziun cun l'onn 2023. Tar ils grevs delicts da violenza sa mussa ina tendenza creschenta dapi il cumenzament da la statistica l'onn 2009.
Ils delicts da mazzament cumplenids èn dentant sa reducids l'onn passà per 15,1%. In zic dapli che la mesadad (26) dals totalmain 45 delicts da mazzament è capitada en il conturn dal da chasa. Tar las persunas mazzadas en il partenadi (anteriur) sa tracti da 17 dunnas e dus umens.
En relaziuns da famiglia u en autras relaziuns da parentella èn vegnids mazzads ina minorenna, ina dunna e tschintg umens.
Augment per dapli ch'in terz tar la criminalitad digitala
Sco gia ils onns è il dumber da delicts digitals creschì fermamain e quai per passa in terz. Latiers tutga per exempel l'abus dals sistems da pajament online u l'uschenumnà phishing, pia l'enguladitsch da datas persunalas cun agid da paginas d'internet sfalsifitgadas.
Il dumber dals delicts registrads da la polizia davart la discriminaziun e l'appel a l'odi crescha cuntinuadamain dapi l'onn 2018. Per l'onn 2024 èn vegnids registrads 595 da tals delicts, quai correspunda ad in augment da 48,4% en cumparegliaziun cun l'onn avant. Da quels pertutgan 88,7% la razza, l'etnia u la religiun, ils ulteriurs 11,3% l'orientaziun sexuala.
En il Grischun percunter è er il dumber da delicts da cybercrime ì enavos. En tut èn l'onn passà vegnids registrads 1'087 cas, quai èn 5% pli paucs ch'il 2023.
En la statistica criminala da la polizia vegnan er publitgadas las cifras tar la lescha davart ils meds narcotics e tar la lescha davart las persunas estras e l'integraziun.
Consum da marihuana dominescha en Grischun
En il Grischun èn er ils delicts da drogas sa reducids fermamain. 2023 eran quai anc 1185 cas, l'onn 2024 ha la polizia criminala dumbrà anc 721. Il pli savens èn vegnids consumads products da chonv. Vendids èn vegnids per gronda part uschenumnads stimulants – sco per exempel cocain, ecstasy u amfetamins. En connex cun drogas ha la polizia registrà dus morts.
En ils secturs da delicts cunter la lescha davart las persunas estras e cunter ils delicts sexuals ha la polizia criminala dal Grischun dumbrà 292 e 133 cas. Il dumber da delicts cunter la lescha davart las persunas estras è s'augmentà per 14 cas. Il pli savens sa tracti qua d'ina activitad da gudogn illegala.
Ils delicts sexuals èn sa reducids per 55 cas. 20 da quests cas han pertutgà acts sexuals cun uffants. La pli gronda reducziun hai dà tar las violaziuns. Quellas èn sa reducidas per 63%, da 16 sin 6 cas.