Belul da l'Eritrea ha in polesch verd. Quel dovra la dunna giuvna per pudair racoltar blers legums, ervas e puma en ses pitschen iert. L'iert da Belul sa chatta sut las vignas davos l'anteriura praschun Sennhof a Cuira.
Cun autras persunas immigradas, persunas solitarias u talas che vivan en paupradad s'entaupa la giuvna Belul mintga mesemna en ils ierts. Tschertins vegnan perfin mintga di per cultivar e tgirar las plantinas en lur parcella.
Il program d'integraziun da success da la HEKS datti gia dapi onns. Ed actualmain en 34 lieus, dapertut en Svizra. Dapi l'onn 2023 ha l'ovra d'agid prendì a fittanza insaquants ierts er a Cuira.
Las participantas ed ils participants dal program a Cuira cultiveschan ils ierts ensemen cun Karin Roth. Ella è ortulana e pedagoga sociala. Sco responsabla per il program porscha ella maun a las persunas cun scolar ellas en dumondas da nutriment, botanica, ma er da cultura e lingua.
Uschia dat l'iert spazi als ortulans e lur famiglias da lavurar communablamain, d'emprender, da sa recrear e da sa colliar. I vegnan er organisadas regularmain occurrenzas publicas en l'iert. Uschia han ils umans cun ina biografia difficila la pussaivladad da sa scuntrar cun autra glieud dal quartier.
«En l’iert emprend’jau uschè bler davart la vita»
Ina giada l'emna vegnan persunas cun biografia da migraziun u persunas solitarias ensemen a Cuira. En ils ierts da l'ovra d'agid evangelica HEKS pon ellas sa barattar, cultivar flurs e legums ed emprender ina massa.
Abunar
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
Parter
