«Er il tschaiver va tras il magun», uschia sa numna la seria da nossa cuschina durant il mais da favrer – il mais da barlot da tschaiver e cortegis. RTR è stà a la tschertga da gourmets u gourmettas tar quatter furmaziuns da musicas da tschaiver en Surselva. Igl n'è betg stà ina missiun simpla, ma ina missiun fitg simpatica ch'è sa mussada sco inspiranta e interessanta.
«Pommes e chicken nuggets», talgia panada, spaghettis, pizza e pizochels u zagrenders dal mazler da Trun – quai èn las spaisas che domineschan durant il tschaiver Sursilvan.
Sin visita tar in exercizi da musica en ils locals d'emprova ha Gaby Degonda pertschavì bler dapli che sulettamain tge che sa tschenta sin il taglier tar las guggas. Commembers e commembras da las Zoclas da Sumvitg, Las Grischalottas da Glion e Falera, las Lieurs da Trun e da las Bagordas da Mustér han era raquintà da lur tradiziuns da tschaiver, da lur passiun per quest temp e davart l'impurtanza da la cumpagnia ed unitad entaifer l'uniun.
Sco commember d'ina gugga na sa sent'ins mai sulet, nus essan sco ina famiglia.
Mintga mesemna avant lur grondas festas da tschaiver cun cortegi en lur vischnanca vegnan protagonistas e protagonists da las quatter guggas a pled. Suenter las 10:00 raschunan els mintgamai dals hits musicals che dattan en il tact al tschaiver sursilvan, davart tradiziuns e davart lur bavrondas e spaisas preferidas cura ch'els en a maisa da cumpagnia. Il tschaiver 2025 fa numnadamain era ses viadi e barlot tras il magun.
-
Bild 1 von 8. Lucas Venzin e Lorena Solèr da las Grischalottas. Lorena: «Il temp da tschaiver è per mai sco la tschintgavla stagiun, bellezza». Bildquelle: RTR.
-
Bild 2 von 8. Las Grischalottas en posa duront l'emprova a Luven. Las Grischalottas festiveschan lur tschaiver ils 15 da favrer cun cortegi en casa da scola a Glion. Bildquelle: RTR.
-
Bild 3 von 8. Flurin Monn, Aline Cajacob, Livio Cajochen da Las Zoclas Sumvitg. Aline: «Nossa tradiziun è da ans costumar la saira da tschaiver a Sumvitg. Quest onn tenor il motto «après ski» ma senza chalzers da skis. Bildquelle: RTR.
-
Bild 4 von 8. Las Zolcas da Sumvitg en prontas per lur barlot dals 8 da favrer. Gian Carlo Albin è dirigent da las Zoclas da Sumvitg. Bildquelle: RTR.
-
Bild 5 von 8. Marina Moser, Natascha Wolf e Tino Cadruvi. Tino, il president da las Lieurs da Trun: «Nos motto: Nus essan «Bombe drauf»!» . Bildquelle: RTR.
-
Bild 6 von 8. Las Lieurs da Trun en lur local d'emprova a Trun. Tschaiver a Trun ha lieu ils 22 da favrer cun cortegi e bal mascrà. Bildquelle: RTR.
-
Bild 7 von 8. Fabio Flepp, Jasmin Bearth e Serafin Beer. Serafin: «Ina da nossas tradiziuns è da ans costumar per l'emprova lunga or el liber. Quai è gist emprova per ils cortegis». Bildquelle: RTR.
-
Bild 8 von 8. Las Bagordas da Mustér celebreschan lur giubileum da 40 onns. Las Bagordas envidan al cortegi cun festa en il center da sport a Mustér ils l'emprim da mars. Bildquelle: RTR.