«Il ragout è servì, bun appetit!»
Uschia ha gourmetta Sara Hauschild envidà a maisa l’atun passà. Igl èn passads plirs mais enfin ch’ins ha chattà ina data per ademplir l’empermischun. Corina Bott aveva gudagnà durant il mais da favrer il past principal da «gourmettas RTR» servì a destinaziun.
L’atun è finalmain reussì a Sara Hauschild da servir ses ragout da bov dal Bain Bun per la famiglia da la victura. Prest tut la famiglia Bott ha pudì laschar gustar il delizius ragout da bov servì cun ina buna pulenta. Damai che gourmetta Martina Werro n’ha betg pudì assister a questa surdada da premi a Valchava, ha ella scrit ina bella charta per Corina Bott. Otg persunas han pudì sa platgar a maisa e laschar gustar il bun gentar preparà da Sara Hauschild e la buna cumpagnia.
Pudair seser a maisa en buna cumpagnia e laschar servir in gentar da festas, quai è per mai sco Nadal, grazia fitg!
