Minisguard sin visita a Sent - Uffants en missiun da decider

Durant quatter dis è vegnì retschertgà, planisà, filmà, taglià e moderà en la chasa da scola a Sent. La 5avla e 6avla classa da Sent han producì ensemen cun redacturas e redacturs da RTR il Minisguard da quest'emna.

Prender decisiuns – il grond tema da l'emna

Ils otg scolars ed ina scolara han creà in'emissiun enturn il tema «prender decisiuns».

Per quai han ils uffants fatg trais gruppas. Mintga gruppa ha in suttema davart «prender decisiuns»:

1. Fatgs davart decisiuns
2. Consequenzas da prender decisiuns
3. Tgi decida insumma?

Glindesdi

Ils trais uffants da mintga gruppa èn lura sa specialisads sin ina part da la producziun da l'emissiun. Ina persuna era il profi da la camera e filmar, la segunda era la schurnalista u il schurnalist da la gruppa e retschertgava ils fatgs e studegiava co raquintar l'istorgia e la terza persuna ha survegnì ina pitschna scolaziun da tagliar videos.

Mardi e mesemna han ils teams lura realisà ensemen lur contribuziuns.

Vitiers han la scolara ed ils scolars era fatg radio e raquintà ina giada per di live tge ch'ella ed els èn gist vi da far.

Gievgia è il grond di da la premiera. L'avantmezdi èn anc las moderaziuns vegnidas registradas ed il team da RTR ha dà las davosas filadas vi da l'emissiun. Suentermezdi è lura tut vegnì preparà per la premiera dal Minisguard a Sent. Là èn tut las scolaras e scolars, magistraglia, famiglias sco era las persunas or dals vitgs vischinants da Sent stads envidads.