Minisguard - RTR sin visita a Bever

RTR ha realisà ensemen cun la scolina e la scola primara dals 29 d'avrigl fin ils 2 da matg emissiuns per radio, televisiun ed il mund digital. Ensemen cun reportras, moderaturas e producents da RTR han las scolaras ed il scolars realisà in podcast, uras da radio live ed els èn era stads responsabels per l’emissiun da Minisguard da sonda, ils 04-05-2024.

In sguard davos las culissas

Gievgia – durant la premiera è naschida la gronda cuminanza

Anc ina giada trair flad profund e lura dar gas per la davosa giada. Uschia ha il davos di da RTR sin visita a Bever cumenzà. Durant che la davosa emissiun da radio live è vegnida producida, è la sala vegnida preparada e tut fatg pront per la premiera. La saira da las 17:00 han las scolaras ed ils scolars da Bever pudì preschentar durant in’ura tge ch'els han fatg ils davos trais dis ad ina sala plaina. Tut commuventà han las aspectaturas ed ils aspectaturs applaudì en pais per ils uffants da Bever.
Ma la cuminanza ch’è naschida durant la premiera crescha ussa enavant en furma da flurs sulegl ch’ils uffants han semnà en vaschs e surdà a la populaziun da Bever cun la finamira, da crear ordlonder suenter las vacanzas in iert da flurs avant scola.

La cuminanza tranter il team da RTR e las scolaras ed ils scolars da Bever ha cunquai era chatta ina fin. Tge che resta èn experientschas, bellezza muments ed ina massa cuntegn.

Gievgia a Bever

Mesemna – il di da las grondas finamiras

Il terz di a Bever sent’ins ch'ils uffants èn daventads mezs profis. Ils videos per il Minisguard vegnan tagliads e las contribuziuns da radio vegnan pli u main fatgas tut sulettas dals uffants. Era las episodas da podcast cumenzan ad avair la furma finala. I para sco sche la lavur fiss daventada quotidiana. Ma la gronda finamira, la premiera da gievgia saira, spetga e cun lezza l'agitaziun e blera lavur supplementara. Decorar la sala da gimnastica, scriver moderaziuns e ponderar co preschentar in’emna lavur grondiusa en ina show finala.

Or d'uffants e creschids èn daventads collegas da lavur che sustegnan ed inspireschan in a l’auter, rian ensemen e partan ina finamira: crear bun cuntegn e preschentar quel cun grond plaschair.

Mesemna a Bever

Mardi – l'emprima ura live al radio sco punct culminant

In’entira ura far radio. Cun crear contribuziuns, tscherner musica e moderar – quai dovra curaschi ma era preparaziuns. Mardi punct las 11:00 han las scolaras ed ils scolars da l’emprima e segunda classa fatg radio. Cun cuntegn divertent plain tschaffen e sco sch'els faschessan quai gia dapi daditg. En il medem temp han ils uffants da scolina fatg lur emprims purtrets da persunas da Bever. Fotografias che mussan lur vista sin la cuminanza en il vitg. Era per il Minisguard èsi vegnì producì da la damaun fin la saira.

Il mardi è la cuminanza nova tranter il team da RTR ed ils uffants da Bever daventada pli ferma. Tuttas e tuts lavuran en gruppa per realisar il meglier cuntegn.

Mardi a Bever

Glindesdi – ord ideas daventa emprim cuntegn

La finamira è clera: fin gievgia saira spetgan quatter emissiuns da radio live, in podcast, in'emissiun dal Minisguard ed ina exposiziun da fotografias. Tut mussa la cuminanza da Bever e vegn realisà dal tuttafatg dals uffants da la scolina e la scola primara da Bever. Sco emprim èsi dentant stà d’emprender d’enconuscher in l’auter, tut la tecnica, installar quella e gia far emprimas intervistas. Or dals uffants ed il team da RTR hai dà il glindesdi gruppas plain engaschi, motivaziun e plaschair – cun in cler plan e cuntegn per mardi.

L’emprima emissiun da radio live da Bever:
Mardi tranter las 11:00 e las 12:00,  live sin Radio RTR. 

Glindesdi a Bever

Emprima sentupada en la chasa da medias a Cuira