Co fissi cun insatge dultsch sco dessert per il brunch da Pasca? Nus avain preparà per tai in simpel recept per ina petta da bananas.
- Preparaziun: 10 minutas
- Temp da coier: 45 minutas
- Decoraziun: 20 minutas
- 1 furma da pettas da ca. 24 cm diameter
Las ingredienzas
Sco recept da basa per la petta faschain nus ina petta da bananas. In simpel recept che blers uffants han gugent.
Per la petta
- 200 grams paintg
- 120 grams zutger brin
- 4 ovs mez gronds
- 2 bananas madiras (ca. 250g)
- 300 grams farina
- 2 tschaduns pitschens pulvra da levon
- 1 presa sal
- 2 tschaduns gronds latg – tut tenor basegn e consistenza
Per la decoraziun
- egls da zutger
- cuvertura ubain 2 tschigulattas alvas
- ca. 20 amarettinis
- ca. 10 smarties
- lains per glatschs u sco alternativa lindornas da lacriza
- bindel
Instrucziun pass per pass
Petta
- Stgaudar il furnel sin 175 grads (temperatura sur e sut). Unscher la furma da ca. 24 cm diameter cun paintg e farina.
- Truschar il paintg lom e maschadar cun il zutger intginas minutas. Guardar che la pasta n’enquaglia betg. Silsuenter agiuntar mintga ov singul in suenter l’auter.
- Purar las bananas madiras cun ina furtgetta u cun in pistun da far buglia. Maschadar las bananas cun la crema d’ovs, paintg e zutger. Alura maschadar la farina cun la pulvra da levon ed il sal ed agiuntar la massa en la crema. Truschar tut fitg bain. Sche la pasta è memia dira, agiuntar in zichel latg.
- Emplenir la pasta en la furma e far coier quella ca. 45 minutas.
Decoraziun
- Far luar la cuvertura u la tschigulatta alva. Stritgar quella sin la petta ed agiuntar ils amarettinis sco ureglias a l’ur da la petta, avant che la tschigulatta è dira. Plazzar ils egls da zutger sin la petta. A mez quella alura anc agiuntar ils smarties en in rudè per furmar il nas da la mieur. A l’ur da la petta vegnan plazzads ils lains per glatschs. Sco alternativa pon ins era duvrar lindornas da lacriza per simbolisar la cua da la mieur.
- Ils lains pon vegnir decorads cun furmar ina bella anza or d’in bindel. A la fin laschar vegnir sitg la tschigulatta e servir la petta da mieurettas.
Maletgs da la petta da mieurettas
