Marco Wildhaber ha in di suenter sia clera victoria a la cursa Transruinaulta – il maraton da trail sur 42,2 kilometers da Glion a Tusaun – era persvadì a la cursa Transviamala sur 19 kilometers da Tusaun a Donat. Wildhaber è schizunt stà il segund svelt da tuts, er da quels ch’èn stads be la dumengia a la partenza. La finala ha el duvrà per omaduas cursas sur passa 60 kilometers cun bunamain 3'000 meters differenza d’autezza 4:47:00 uras. Marco Wildhaber è uschia stà 12 minutas pli spert che Andreas Kälin e 25 minutas pli spert che l’Austriac Hannes Pongruber ch’è currì la sonda ses 50avel maraton da la carriera.
Resultats Transviamala 2024
Premiera ed ina nova regina
Tar las dunnas dastga Xenia Braun dal chantun Son Gagl prender a chasa sia emprima curuna sco regina da las chavorgias. La giuvna da 28 onns è stada per l’emprima giada insumma a la partenza a las cursas Transruinaulta e Transviamala. Ella è vegnida en omaduas cursas terza, ma gudogna la cumbinaziun en in temp total da 6:04:27 uras. Xenia Braun è uschia stada passa 23 minutas pli sperta che Claudia Bachmann e passa minutas pli sperta che Stefanie Maurer.
Victuras e victurs da las cursas Transruinaulta e Transviamala
David Stalder dal chantun Turitg e Loreana Eberle da Zizers daventan il prinzi respectiv la princessa da las chavorgias 2024. Omadus han gudagnà la cumbinaziun da las duas cursas curtas, quella da Glion a Razén sur 24 kilometers e da Tusaun direct a Donat sur 11,5 kilometers.
Jonas Baumann cun ulteriura victoria da chasa
La cursa originala dal Transviamala sur 19 kilometers han gudagnà quest onn tar ils umens Simon Schäppi (1:21:15 uras) e tar las dunnas Mira Irion (1:41:51 uras), omadus dal chantun Turitg. La cursa Transviamala curta sur 11,5 kilometers ha gudagnà il passlungist da Lon, Jonas Baumann, avant Sandro Michael da Ziràn. Tar las dunnas ha gudagnà Gianna Chiara Wohler avant sia sora Carla Wohler ch’han lur ragischs a Tusaun.
Tut en tut èn sa participads la dumengia a las cursas dal Transviamala radund 800 curridras e curriders. Er l’onn proxim datti las duas cursas da trail che mainan tras la chavorgias da la Ruinaulta e da la Viamala. Il Transruinaulta 2025 ha lieu la sonda, ils 18 d’october ed il Transviamala la dumengia, ils 19 d’october.
Transruinaulta: Ina Grischuna ed in Grischun èn ils pli sperts
Marco Wildhaber ha gia la sonda cumenzà cun in resultat suveran. Il currider da 33 onns ha gudagnà il maraton da trail sur 42,2 kilometers cun 1'800 meters d’autezza da Glion a Tusaun en in temp da 3:23:19 uras ed è uschia stà passa 7 minutas pli spert ch’il segund, Andreas Kälin.
Tar las dunnas ha Flurina Eichholzer gudagnà la cursa roiala a moda suverana – quai tar sia emprima cursa insumma sur la distanza da maraton. La Jaura ch’abitescha a Zernez è la suletta dunna ch’ha dumagnà il viadi da Glion a Tusaun sut 4 uras ed è uschia stada 13 minutas pli sperta che Angela Gisler.
Rangaziun Transruinaulta 2024
Tut en tut èn bunamain 700 curridras e curriders sa participads quest onn a la cursa da currer Transruinaulta. Bun la mesadad han fatg la cursa roiala da Glion a Tusaun, l’autra mesadad la Transruinaulta Curta sur 24 kilometers da Glion fin a Razén.
