Transruinaulta/Transviamala - Enstagl da duas gist tschintg cursas

Pervia da la crisa da corona na vegnan las duas cursas Transruinaulta e Transviamala betg manadas atras en il rom usità mez/fin october. Sin ina partenza na ston curridras e curriders dentant tuttina betg desister. Enstagl da las duas cursas classicas datti quest onn tschintg events en in rom pli pitschen.

Currer da di e da notg

Ensemen cun las organisaziuns turisticas ch’èn involvidas ed ils sponsurs principals ha il comité d’organisaziun la finala decidì per tschintg events sur bun trais mais. Sin il program stattan dus events dal di, dus events da notg sco er ina cursa da muntogna en la Val Stussavgia. Il dumber da participants è mintgamai limità sin 200 curridras e curriders. Ed auter ch’ils onns passads na vegn quest onn betg currì sin temp, mabain ensemen en differentas gruppas da fermezza. Uschia na datti er nagina rangaziun.

Betg a mancar tar quests events vegnan ils bizochels ed oravant tut il buffet da pettas. Quai saja quai che restia onn per onn il meglier en memoria a curridras e curriders. Ed in onn senza buffet da pettas, quai n’avessi betg dastgà esser, uschia Thomas Häusermann.