L’emprima ediziun dal Swiss Epic ha gì lieu l’onn 2’014 en il chantun Valais. Suenter in per ediziuns ha la cursa da mountainbike da pliras etappas fatg midada en il chantun Grischun. Dapi il 2019 datti la cursa sin ils trails e las sendas grischunas. Equipas da dus ciclistas e ciclists participeschan sco team a las etappas dal Swiss Epic. Il duo sin il mountainbike ha da far las etappas ensemen.
Equipa San Murezzan cun Gian-Luca Lüthi e Jann Rudolph
Gian-Luca Lüthi da Puntraschigna e Jann Rudolph enconuschan in l'auter da la scola. Omadus èn al gimnasi da sport a Tavau. Ensemen sco equipa San Murezzan fan els per l’emprima giada la cursa dal Swiss Epic. Cun auters partenaris da squadra han dentant Gian-Luca Lüthi ed era Jann Rudolph gia fatg ina giada la cursa extrema.
Tar nus en il team è quai uschia ch'il ferm è davant. Sche quel davosvart perda memia temp dat quel in sbratg.
Dapi emnas trenescha il duo per il Swiss Epic
La gronda differenza dal Swiss Epic cumpareglià cun autras cursas da mountainbike è sia lunghezza. Tschintg etappas e 339 kilometers aifer da tschintg dis è tut insatge auter che las cursas che Gian-Luca Lüthi e Jann Rudolph fan uschiglio. Els èn disads da far cursas che van ina ura u in'ura e mez. Tar il Swiss Epic èn las etappas bainquant pli lungas, ed ina greva etappa segua a l’autra durant tschintg dis. La preparaziun, la recreaziun tranter las etappas, il nutriment, e las fasas da ruaus vegnan ad esser essenzialas. La finamira dal duo engiadinais è simplamain da vegnir atras. E forsa, sin etappas in zichel pli curtas dad empruvar da sa pudair mussar a la concurrenza.
