Las duas velocipedistas passiunadas lavuran ensemen tar la Banca Chantunala Grischuna ed uss absolveschan ellas er ensemen il Swiss Epic 2023. In duo tut spezial sch'ins guarda sin lur abilitads da velo: La Grischuna Gianna Meier è normalmain da chasa sin il velo da cursa e la Songagliaisa Lea Rutz sin il mountainbike d'enduro, ch'è ina maschaida da cross-country e downhill. Uschia èn era lur fermezzas differentas. Gianna Meier saja pli ferma dad ir ensi e Lea Rutz cur ch'i giaja aval.
Ella sto spitgar sin mai cur che nus giain ensi ed jeu spetg sin ella cur che nus giain aval.
La gnervusitad, la tensiun, dentant er il plaschair è grond curt avant ch'i va liber cun las tschintg etappas, ils radund 350 kilometers ed ils 11'000 meters d'autezza. Per omaduas èsi numnadamain ina premiera al Swiss Epic.
La finamira è clera per las duas sportistas passiunadas, numnadamain da tegnair la dira sur l'entir Swiss Epic e da dumagnar en l'arrivada.
Probabel vegnin nus a blastemmar e s'agitar. Ma quai tutga vitiers.
Strusch trenament communabel
Omaduas dunnas passentan en il temp liber dabler temp sin il velo. Cunquai ch'ellas èn dentant, per regla, da chasa sin differents velos, è il trenament communabel vegnì a la curta. Quai concedan Gianna Meier sco era Lea Rutz. Perquai dettia probabel era persunas che na san betg propi chapir ch'ellas van communablamain a la partenza al «Swiss Epic 2023».
I saja in experiment, di Lea Rutz, ed agiunta ch'i vegnia diraglia. Ma las duas collavuraturas da la Banca Chantunala Grischuna èn er da buna speranza ch'i vegn in'experientscha unica. Cun in «happy end».
