Er questa stad filan las mountainbikeras ed ils mountainbikers da la seria Swiss Epic puspè tras il Grischun. Il Swiss Epic è ina cursa da tschintg etappas tras tut il Grischun. Auter che tar las bleras cursas da mountainbike na cumbattan las ciclistas ed ils ciclists betg persuls, mabain en teams da dus. I dat squadras d'umens, da dunnas ed equipas maschadadas. Da la partida vegnan ad esser ciclists e ciclistas professiunalas ma er amaturas ed amaturs.
Sur 339 kilometers tras il Grischun
La cursa cumenza mardi, ils 15 d'avust a Lai, il proxim di suonda il viadi sur l'Alvra fin a San Murezzan. Suenter la terz'etappa enturn San Murezzan spetga l'etappa da San Murezzan sur il traject dal Bikemaraton en Engiadina sur l'Alvra fin a Tavau. Sin las sendas da Tavau va lura a fin la cursa ils 19 d'avust. Tut en tut vegnan ils ciclists e las ciclistas a far 339 kilometers e passa 10'850 meters d'autezza.
Grischuns cumbattan per la victoria
Tar las dunnas emprovan las duas Tudestgas Bettina Janas ed Adelheid Morath da defender lur titel da l'onn passà, ellas valan sco favuritas. Er dus teams svizzers èn annunziads, quai cun Chrystelle Baumann e Sandra Stadelmann sco er Larissa Rossner e Melanie Eichmann.
Tar ils umens n'èn ils victurs da l'onn passà, Fabian Rabensteiner e Daniel Geismayr, betg da la partida. Persuenter bain inqual team svizzer. Previs era ch'ils dus Grischuns Fadri Barandun da Samedan ed Andrin Beeli da Sagogn furmian in team, sco er gia tar il Cape Epic en l'Africa dal Sid. Il ciclist sursilvan Beeli è dentant sa blessà en in trenament intginas emnas avant la concurrenza ed è uss sfurzà da guardar tiers. Remplazzà vegn el da Konny Looser.
L'onn passà èn Barandun e Beeli anc ids a la partenza per duas differentas equipas . Fadri Barandun era vegnì 6avel ensemen cun il Tudestg Vinzent Dorn, gist davos els avevan finì Andrin Beeli ensemen cun il Beltg Frans Claes.
