Suenter in lunga fasa da preparaziun lantscha Chiara Solèr sia stagiun da mountainbike a las cursas dal Swiss Bike Cup a Rivera en la regiun dal Monteceneri en il Tessin. Là frunta la giuvna Lumneziana gia l’emprima giada sin gronda concurrenza.
Prioritad han dentant las cursas da la cuppa mundiala. La finamira saja da cuntanscher in plaz sut las top 10 per sa qualifitgar per ils campiunadis d’Europa il fanadur en il Portugal ed er ils campiunadis mundials il settember a Crans-Montana – il punct culminant da la stagiun. Be in’emna pli tard stattan gia sin il program las cursas da la cuppa mundiala a Lai, quasi avant l’isch-chasa.
Mes di è planisà da la damaun fin la saira cun lavurar, trenar, far viadis e cursas. Metter tut quai sut in tetg n’è betg adina simpel.
Chiara Solèr appartegna dapi sis onns al cader naziunal da mountainbike. Quest onn èsi la segunda stagiun ch’ella sa mesira sin plaun naziunal ed internaziunal cun las meglras da la categoria U23. Il matg terminescha ella l’emprendissadi mercantil tar la vischnanca da Lumnezia. Fin lura lavura Chiara Solèr en in pensum parzial da 70%. Suenter l’emprendissadi po ella reducir il pensum da lavur sin 50% e sa concentrar anc pli fitg sin il sport da mountainbike.
La Lumneziana da 20 onns è fitta e pronta per la nova stagiun, malgrà che la preparaziun – cunzunt ils davos mais – saja stada fitg intensiva. Dus camps da trenament ha ella frequentà cun l’equipa naziunala ed in cun il team «Thömus Youngstars» en Spagna, l'Italia ed a Gran Canaria.
