Chiara Solèr era cupitgada gia en l’emprim trenament sin il percurs da cursa e dada sin il chau. Durant l’entira cursa ha ella era patì da mal il chau uschia ch’in meglier resultat n’è betg stà pussibel. E tuttina po la giuvna mountainbikera da Lumbrein esser cuntenta e loscha da sia prestaziun sut quellas circumstanzas.
Dar si n’è mai stà in’opziun. Jau hai vulì morder fin la fin.
Era sch’il resultat n’è betg quel che Chiara Solèr ha giavischà dastga ella bandunar la Scozia cun avair gudagnà blera experientscha. E la proxima schanza vegn puspè. Chiara Solèr ha pir 18 onns ed è anc a l’entschatta da sia carriera.
Anina Hutter sut las top 10
Ina buna prestaziun ha l’autra Grischuna mussà en la cursa da las junioras U19, Anina Hutter da Trimmis. In di suenter ses titel da campiun mundial cun la staffetta svizra en il Team Relay nua che Hutter ha procurà per la differenza è ella vegnida 6avla en la cursa principala da cross-country. La Grischuna ch’è uschia er stada la meglra juniora svizra ha pers 2,43 secundas sin la victura canadaisa Isabella Holmgren.
Mauro Hassler sut ils top 30
Il sulet grischun en la cursa da cross-country dals juniors sut 19 onns, Mauro Hassler da Cuira, è vegnì 29avel. El ha pers 5:34 minutas sin il nov campiun mundial, Albert Philipsen dal Danemarc. Meglier svizzer tar ils juniors è stà Loris Hattenschwiler sco 8avel.
PREVISTA - Chiara Solèr: «Jau vi esser sut las top 20»
La Lumneziana da 18 onns è ina da trais grischuns a la partenza da las cursas da cross-country dals juniors sut 19 onns als campiunadis mundials a Glasgow. Ensemen cun Chiara Solèr parta er Anina Hutter da Trimmis ch’ha gudagnà aur en il Team Relay. Tar ils juniors parta Mauro Hassler da Cuira.
L’aventura «Glasgow» n’ha dentant betg cumenzà bain per Chiara Solèr da Lumbrein. Ella è cupitgada gist en l’emprim trenament, quai en ina da las passaschas las pli tecnicas dal percurs a Glentress Forest, e sa blessada principalmain en fatscha.
La giuvna lumneziana ha però gì cletg en il discletg e mitschada senza ruttadiras. Uschia po ella tuttina ir a la partenza a la pli impurtanta cursa da la stagiun ed il punct culminant da quest onn. La devisa è da dar tut e cuntanscher in plaz almain sut las meglras 20. Quai aveva Chiara Solèr manchentà be per pauc a ses emprims campiunadis mundials avant in onn. A Les Gets en Frantscha er’ella vegnida 23avla.