Loipa Gonda a Ladir - Ina maschina da far loipa empè d'ina Harley

Far passlung sin ina terrassa sulegliva sin 1'300 meters sur mar, sur il vitg da Ladir. Quai pon indigens e giasts far uss il sisavel enviern e quai grazia a Giusep Arpagaus. Senza il nar da passlung e sia iniziativa privata da cumprar ina maschina occasiun e preparar ils 4,2 kilometers loipa na dessi betg quella purschida. La Loipa Gonda porscha tant tschancuns per novizs sco per curriders ambiziunads. Quai en ils stils classic e skating. E cun praticar quest sport pon ins giudair ina vista magnifica.

400 uras lavur durant in enviern

L'enviern avant quatter onns è stà il meglier puncto naiv dapi che Giusep Arpagaus ha investì da quai da 65'000 francs per sia maschina ch'el numna tut charin «sia poppa». Ina maschina occasiun, il «Pistenbully 100» ch'è arrivà dal Scanvetg, dad Arosa en Surselva, a Ladir. Buns envierns èsi da quai da 400 uras lavur che Giusep Arpagaus investescha per preparar la Loipa Gonda. Ma igl ha era dà in enviern ch'el ha be ina suletta giada pudì preparar la loipa, curt suenter han temperaturas miaivlas e plievgia lavagà la loipa ed igl è quai enviern stà finì avant che propi cumenzar.

Sia passiun per la loipa e per far passlung è ina chaussa dal cor, ses hobi. Preparar la loipa fa el sco hobi. Dasper sia lavur da pedagog social, responsabel per l'integraziun tar l'ARGO. Il plaschair ed ils bels resuns da tut ils curriders sajan sia pajaglia. Giusep Arpagaus è pli probabel era l'unic magister da passlung cun sia atgna loipa. Proximamain cumenzan las fin d'emnas ch'el porscha curs da passlung sin la Loipa Gonda. Fin uss èn las cundiziuns stadas optimalas. Er ils dis da las festas da Nadal e Bumaun è stada pulita truscha sin la loipa sur Ladir. Ma guardond enavant spera Giusep Arpagaus ch'i dettia anc ina giada in pau naiv, e surtut ch'i vegnia pli fraid. Cumpareglià cun las loipas che giaschan pli bass sco quellas a Castrisch u a Sagogn saja sia che s'extenda da 1'300 fin 1'380 meters sur mar en avantatg e profiteschia da l'autezza ed era co ch'ella è posiziunada. Surtut en la planira po la naiv tegnair bain.

Era da viadi per l'Arena Alva

Dentant fan Giusep Arpagaus e sia maschina era lavur per las pendicularas da l'Arena Alva cun preparar la pista da skis davent dal Crap Masegn giu Ladir e Ruschein. Plinavant prepara el era la via da viandar d'enviern tranter Ruschein, Ladir e Falera. Quai munta era magari da star si la notg da las 02:00 e fullar via tras la naiv. Suenter ir a lavurar tar l'ARGO e la saira èsi lura puspè la loipa che spetga da vegnir preparada da frestg.