Far passlung? Po esser strapatschant, dentant il medem mument er in gaudi. Sch'ins fa passlung sin la loipa Nordic Surselva tranter Trun e Mustér inscuntr'ins da tuttas sorts curridras e curriders: ils ambiziunads che portan l'equipament professiunal sco profis, natiralmain era cun ils egliers spezials. Dentant er il hobipasslunghist che ha cumbinà ses outfit da vestgadira plitost adattada per auters sports.
Nus avain fatg ina visita sin la loipa e discurrì cun la glieud che nus avain entupà ed era cun ils idealists che lavuran di per di en favur da la loipa da bun 30 kilometer. Igl è stà in di suenter ina notg da plievgia, ma tuttina n'ha quai betg tegnì davent ils curriders e las curridras dal sport da passlung.
La loipa Nordic Surselva – in'istorgia da success
Dapi bun 50 onns vegn gia fatg passlung tranter Mustér e Trun. Al cumenzament dals onns 70 han glieud da Mustér fatg per l'emprima giada quest viadi cun skis da passlung. In viadi ch'era da lez temp ina pulita aventura. I vegniva ì tras las chaglias e tras il guaud. Ina loipa furnida e preparada na devi betg. Uschia ha l'istorgia da la loipa da Nordic Surselva cumenzà. Oz dumbra quella var 30 kilometers loipa ed a Trun datti er ina loipa da notg. Sche pussaivel e sche las cundiziuns permettan, vegn la loipa preparada mintga di. Dapi onns è quai l'incumbensa da Thomas Castelberg. El avain nus accumpagnà durant la lavur e purtretà avant intgins onns.
Durant in top di èn 400-500 persunas da chattar sin la loipa da Nordic Surselva. Cifras che n'èn betg da cumparegliar cun pli baud, di Flurin Maissen, il president da Nordic Surselva. «Quai è schon in dumber impressiunant cumpareglià cun las 20-30 persunas ch'ins entupava avant 30-40 onns». El enconuscha la loipa sco strusch in auter. Quai sa chapescha quasi da sasez sch'ins è dapi bun 40 onns president da l'uniun ch'è responsabla per la loipa tranter Mustér e Trun.
Nus dumbrain oz 20-30 gia dapli osps sin la loipa che tar il cumenzament da la loipa.
Quai è la loipa e la glieud
-
Bild 1 von 12. La loipa frestg preparada. Bildquelle: Nordic Surselva.
-
Bild 2 von 12. La loipa sin il plaun Surrein. In tschancun fitg guliv da radund 4 kilometers. Bildquelle: Nordic Surselva.
-
Bild 3 von 12. Il president da l'uniun Nordic Surselva, Flurin Maissen. Bildquelle: RTR.
-
Bild 4 von 12. Claudia Maissen maina dapi 20 onns l'ustaria Placi Pign a Surrein. Bildquelle: RTR.
-
Bild 5 von 12. Dominic Venzin è manader da la filiala Menzli Sport a Mustér. Bildquelle: RTR.
-
Bild 6 von 12. Il plaun Surrein è in lieu optimal per far scola da passlung. Bildquelle: RTR.
-
Bild 7 von 12. Els èn vegnids dal chantun Argovia en vacanzas en la Cadi e giaudan la loipa. Bildquelle: RTR.
-
Bild 8 von 12. In currider ambiziunà dal chantun Turitg che sa participescha quest enviern a pliras cursas da passlung. Bildquelle: RTR.
-
Bild 9 von 12. In'excursiun sin la loipa tutga tar il mintgadi da la famiglia Livers. Bildquelle: RTR.
-
Bild 10 von 12. Avantmezdi a currer e suentermezdi sin la loipa è sia devisa. Bildquelle: RTR.
-
Bild 11 von 12. Ir passlung persul saja flot, cunquai ch'ins possia lura ir l'agen tempo, di quest indigen. Bildquelle: RTR.
-
Bild 12 von 12. El haja pir cumenzà a far passlung cun sia pensiun. Uss giaja el 3-4 giadas per emna sin la loipa. Bildquelle: RTR.
La loipa è vegnida durant ils ultims decennis adina pli dumandada ed adina pli plaina. Magari èsi perfin in lieu da scuntrada. Quai percorschan era las stizuns da sport u la suletta ustaria che schai gist sper la loipa. Numnadamain l'ustaria Placi Pign cun l'ustiera Claudia Maissen. In'ustiera che giauda sch'i marscha e che di che spezialmain il temp da corona haja anc ina giada dà in stausch da glieud.
La marella «ir sin loipa e la vita è bella» prenda vus durant in di sin la loipa Nordic Surselva e lai vegnir a pled persunas che van suenter a lur hobi u era las persunas che dattan insumma la tempra a questa loipa en la Cadi.