Laax Open 2025 - Il spectacul sin il Crap Sogn Gion è a fin

Finals da snowboard en la mesapipa

Sco finiziun da l'emna da freestyle sin il Crap Sogn Gion hai dà il final da snowboard en la mesapipa. En il final da las dunnas n'è stada nagina atleta svizra a la partenza. Triumfà ha l'Americana Chloe Kim avant la Coreana Gaon Choi e la segunda Americana en il final Maddie Mastro.

Tar ils umens è il Svizzer Patrick Burgener daventà 8avel en la mesapipa, el è stà il sulet atlet svizzer ch'è sa qualifitgà per il final. Cun ses 60.75 puncts ha el dentant gì nagina schanza sin ils rangs davant. La victoria è ida al rutinier Scotty James da l'Australia che gudogna gia per la quart giada al Laax Open. El ha battì ils Giapunais Ruka Hirano ed Ayumu Hirano.

Finals snowboard slopestyle

Tar ils umens gudogna il Canadais Cameron Spalding cun 86,63 puncts la concurrenza da slopestyle da snowboard al Laax Open. Sco sulet Svizzer en il final manchenta Jonas Hasler cun 82,20 puncts il podest e sa tschenta sin il tschintgavel rang. Anc mai è il giuven da 18 onns dal chantun Turgovia stà classà meglier en la cuppa mundiala. Auters Svizzers n'èn betg stads da la partida en il final dals megliers otg.

En il final da las dunnas gudogna Mia Brookes da la Gronda Britannia cleramain cun 84,86 puncts avant Zoi Sadowski Synnott da la Nova Zelanda. Svizras èn naginas sa qualifitgadas per il final dal slopestyle.

Final da freeski slopestyle

Nagina plazza da podest per Andri Ragettli a Laax. A sia cursa da chasa al Laax Open è il freeskier da Flem vegni sisavel en il slopestlye. En omadus percurs ha l’atlet da 26 onns fatg pitschens sbagls uschia ch’el n’ha betg pudì tegnair pitg cun ils megliers. Avant dus onns aveva Ragettli gudagnà la cursa sin il Crap s. Gion. Gudagnà la cursa da slopestyle ha il norvegiais Birk Ruud avant ils dus Americans Marc Forehand ed Alex Hall.

Tas las dunnas è la Svizra Mathilde Gremaud vegnida terza. Gudagnà la concurrenza ha la Chinaisa Eileen Gu. Segunda è vegnida Megan Oldham dal Canada.

In Svizzer sa qualifitgescha per final da mesapipa

Il Svizzer snowboardist Patrick Burgener è sa qualifitgà per il final da mesapipa. Iouri Podladtchikov manchenta quel. El è sa plazzà en il mezfinal sin il setavel plaz – plaz sis ed in punct dapli avessan tanschì per avanzar en il final tar ses comeback suenter quatter onns pausa.
Mintgamai ils sis megliers snowboardists da dus heats èn sa qualifitgads per il final da mesapipa.

Ils Svizzers:

Emprim heat

• 7. Iouri Podlatchikov
• 10. Gian Andrin Biele

Segund heat

• 6. Patrick Burgener
• 8. Jonas Hasler
• 13. Mischa Zuercher
• 18. Leonardo Saraiva

En la mesapipa domineschan las Giapunaisas

Per il final da snowboard en la mesapipa da las dunnas èn cunzunt Giapunaisas sa qualifitgadas. Ellas han conquistà la mesadad da las otg plazzas. La meglra è dentant stada Chloe Kim dals Stadis Unids. Per las Svizras n'hai dà nagin plaz en il final. Il final ha lura lieu sonda a partir da las 18:00.

Las Svizras:

• 11. Isabelle Lötscher
• 14. Berenice Wicki
• 26. Lura Wicki
• 30. Soha Janett

Final da slopestyle senza Svizras

Il final da las dunnas en il slopestyle da snowboard ha lieu senza ina Svizra. Andrina Salis sco 12avla ed Ariane Burri sco 13avla han manchentà il final da las meglras otg atletas. En il final da sonda dattan autras naziuns atras la tarifa. Gudagnà il mezfinal ha Mia Brookes da la Gronda Britannia. La giuvna da 18 onns ha mussà la meglra prestaziun avant l'Austriaca Anna Gasser.

Las Svizras

• 12. Salis Andrina
• 13. Burri Ariane

Laax Open 2025

Ils megliers freestylers dal mund èn er quest'onn puspè da la partida a Laax. Ils topshots svizzers Andri Ragettli, Mathilde Gremaud, Sarah Höfflin u er Jan Scherrer vegnan a procurar per in spectachel a la 10avla ediziun dal Laax Open. Spezialmain dal indigen Andri Ragettli vegn natiralmain spetgà bler a ses event da chasa. L'onn passà è l'atlet da 26 onns daventà tschintgavel. L'onn 2023 ha el gudagnà il slopestyle al Laax Open.

Las decisiuns per las plazzas da podest datti vers la fin d'emna. Il venderdi datti da vesair il final dals skiunz en la disciplina da slopestyle. La sonda è lura il focus sin ils snowboardists. Emprim en ils megliers slopestylers en acziun e la saira sut glisch da projecturs datti lura da vesair il spectachel en la mesapipa.

Qua chattais ina survista dal program sportiv dal Laax Open 2025:

Sper il program sportiv sin il Crap Sogn Gion datti era acts musicals en il vitg, a Laax Murschetg.

Ta participescha e gudogna

Dai resposta correct a las dumondas en il formular e cun in zic cletg gudognas ti in bigliet dal di per il territori da Laax.

Dus frars sumegliants u tuttina betg?

Nicola (22) e Gian Andri Bolinger (20) èn frars ed omadus activs en la scena da freestyle. Ils dus skiunzs sa participeschan perfin a las medemas disciplinas. Al Laax Open èn ils dus Engiadinais en acziun en la disciplina slopestyle.

Fin oz spetgan ils dus da Zuoz anc il grond success en la cuppa mundiala. La meglra plazza da Nicola Bolinger è in 17avel rang e per Gian Andri Bolinger in 15avel rang. In stgalim pli a bass – en la cuppa d'Europa – han els dentant omadus gia festivà victorias.

RTR ha discurrì cun ils dus Engiadinais, avant lur qualificaziun al Laax Open, e guardà, tranter auter, quant sumegliants u differents ch’els èn atgnamain.

Da tut quai che gira sper la mesapipa e la schanza al Laax Open rapporta RTR era: